Almaty oblysy Kerbulaq aýdany ákimdigi júk tiegishtiń aldyna shyqqan áieldiń videosyn "arandatý" dep atady. Sondai-aq, ákimdik kómir jetkilikti ekenin aityp, turǵyndardan úreilenbeýdi surady, - dep habarlaidy Tengrinews.kz tilshisi.
"Dúrbeleń týdyrmaýdy suraimyz. Iá, Internette júk tiegishtiń aldynda otyrǵan áieldiń videosy tarap ketti. Munyń bári arandatý. Búginde Kerbulaq óńiri turǵyndaryna kómir satý jumystary júrgizilip jatyr: "Sanchez" JK (Shubarkól), "SaýdaKómir" JShS (Qarajyra). Saryózek stantsiiasyna qazanda 42 vagon jetkizildi. Búginde Saryózek stantsiiasynda 10 vagon bar. Bári tártippen júrgizilip jatyr", - dedi Kerbulaq aýdanynyń ákimi Ǵaliasqar Sarybaev.
Ákimdik Kerbulaq aýdany turǵyndarynyń jylý berý maýsymyndaǵy kómirge suranysy 74 myń tonna bolatynyn, onyń 52,8 myń tonnasy, iaǵni 71 paiyzy satylǵanyn aitty. Almaty oblysyna orta eseppen táýligine 90 vagon kómir jetkiziledi. Búginde 926,3 myń tonna nemese 68 paiyzy satyldy, jazǵy kezeńdegi qoimalarda qaldyq 13,3 myń tonna kómir bar. Óńirde 77 kómir oshaǵy men qoimasy bar, onyń ishinde 50-i kómir oshaǵy, 27 qoima jáne Raiymbek aýdanyndaǵy Oiqaraǵai kómir kenishi.
"Óńir boiynsha bir tonna kómirdiń ortasha baǵasy 14-14,5 myń teńge. Temirjol qatynasy joq óńirlerde kómir avtokólikpen jetkiziledi, bul kómirdiń baǵasyna áser etedi. Mundai aimaqtarda jetkizilimderdi esepke almaǵanda baǵa 19-20 myń teńgege deiin jetedi. Aýdandar men qalalar ákimdigi jaz mezgilinde qatty otyndy aldyn ala satyp alý qajettigi boiynsha turaqty negizde túsindirme jumystaryn júrgizdi. Qatty otyn satyp alǵysy keletinderdiń suranysy kómirdiń jasandy tapshylyǵyna ákeldi", - dep túsindirdi ákimdik.
