Buqaralyq sport óńirlerdegi kóptegen azamat úshin áli de qoljetimdi emes. Bul týraly QR Parlamenti Májilisi Áleýmettik-mádeni damý komitetiniń tóraǵasy Jámilá Nurmanbetova málim etti, dep habarlaidy "Ult aqparat".
«Búgingi tańda sporttyq infraqurylymynyń qoljetimdigi, dene shynyqtyrý jáne sport boiynsha synyptan tys sabaqtardy júrgizgeni úshin muǵalimderge qosymsha aqy tóleý sekildi birqatar normalar zańnamalyq turǵyda bekitilgen. 2021 jylǵy 1 mamyrdan bastap memlekettik sporttyq tapsyrysty ornalastyrý arqyly balalar men jasóspirimderge arnalǵan sport sektsiialaryn jan basyna shaqqandaǵy qarjylandyrý tetigi iske qosyldy. 2025 jylǵa deiingi Nur Otan partiiasynyń sailaýaldy baǵdarlamasynyń oryndalýy jol kartasyn iske asyrý úshin balalar-jasóspirimder dene shynyqtyrý klýbtarynyń sanyn 119-ǵa deiin ulǵaitý jáne barlyq oblys pen iri aýdan ortalyqtaryna 128 myńnan astam sport sektsiialaryn ashý kózdelgen», - dedi Nurmanbetova Májilis komitetiniń keńeitilgen otyrysynda.
Onyń aitýynsha, Qazaqstan boiynsha 2021 jylǵa 40 myńnan astam balany qamtityn memlekettik sport tapsyrysyna 5 mlrd teńgeden astam qarajat qarastyrylǵan.
«Qabyldanyp jatqan sharalarǵa qaramastan, buqaralyq sport óńirlerdegi kóptegen azamat úshin áli de qoljetimdi emes. Sondyqtan búgin komitette eki mańyzdy másele - sporttyq infraqurylymnyń qoljetimdigi men qarajatty kásipqoi sporttan buqaralyq sportqa qaita bólýdi talqylaý jáne olardy sheshýdiń tiimdi joldaryn ázirleý usynylady», - dedi Jámilá Nurmanbetova.
Óz kezeginde QR Parlamenti Májilisi tóraǵasynyń orynbasary Balaim Kesebaeva jergilikti atqarýshy organdardyń aldyna buqaralyq sport pen dene shynyqtyrýdyń qoljetimdiligin qamtamasyz etý mindeti qoiylǵanyn eske saldy.
Joldaýdy iske asyrý úshin ótken jyldyń sońynda (2020 jylǵy 30 jeltoqsanda) «Qazaqstan Respýblikasynyń keibir zańnamalyq aktilerine mádeniet, dene shynyqtyrý jáne sport máseleleri boiynsha ózgerister men tolyqtyrýlar engizý týraly» Zań qabyldandy.
«Zańnyń negizgi baǵyty jergilikti atqarýshy organdardyń qoljetimdi sporttyq infraqurylymdy qurý boiynsha quzyretin keńeitý arqyly halyqpen jumys isteý úshin sport nusqaýshylarymen qamtamasyz etý jáne balalar-jasóspirimder dene shynyqtyrý daiarlyǵy klýbtarynyń jelisin keńeitý bolyp sanalady. Zańda qoldanystaǵy zańnamaǵa balalardyń sport sektsiialaryn jan basyna shaqqanda qarjylandyrý negizinde memlekettik sporttyq tapsyrys tetigin engizý de kózdeledi. Osyǵan bailanysty sporttyq infraqurylymdy tek qalalarda ǵana emes, sonymen birge aýdandar men aýyldarda da damytý, halyqtyń irtúrli toptary úshin sporttyq obektilerdiń qoljetimdiligi deńgeiin arttyrý asa mańyzdy», - dedi Kesebaeva.
