© Photo: Unsplash/Leo Rivas
2024 jyldyń 1 qańtarynan bastap «Ulttyq qor – balalarǵa» jobasy resmi qoldanysqa endi. Aldyn ala málimet boiynsha, joba alǵashqy jyldyń ózinde 7 millionnan astam balany qamtidy, dep habarlaidy Kazinform agenttigi.
Ulttyq qordy basqarý Ulttyq banktiń quzyryndaǵy sharýa bolǵanmen, «Ulttyq qor — balalarǵa» jobasynyń úilestirýshisi — Qarjy ministrligi.
Al operator — Biryńǵai jinaqtaýshy zeinetaqy qory.
Ádilet ministrliginiń bazasyndaǵy derek negizinde 2024 jyldyń 1 qańtaryndaǵy jaǵdai boiynsha 18-ge tolmaǵan balalardyń tizimi jasalady.
Sol tizim negizinde Ulttyq qordyń investitsiialyq tabysynyń teń jartysyn neshe balaǵa teńdei bólý kerektigi belgili bolady.
2024 jyldyń 1 aqpanynda osy esep negizinde 18-ge tolmaǵan balalardyń bárine birdei mólsherde aqsha aýdaryla bastaidy.
18 jasqa tolǵan soń bala Ulttyq qordan túsken tólemdi turǵyn úi satyp alýǵa, bilim alýǵa, onyń ishinde shetelde bilim alý múmkindigine jumsai alady.
Biraq baspanany tek Qazaqstan aýmaǵynan satyp alýy kerek.
Ulttyq qor tólemin aýdarý bala qaitys bolǵan jaǵdaida toqtatylady. Bul jaǵdaida muragerlik quqyǵy kúshine enedi.
Ondai balanyń murageri kim bola alatyny Azamattyq kodekstiń airyqsha bóliginde kórsetilgen, iaǵni ár balanyń murageri naqty jaǵdaiy boiynsha anyqtalady.
Al zańdy murager baladan qalǵan aqshany óz qalaýynsha paidalanady.
Bala Qazaqstan azamattyǵynan aiyrylǵan kezde Ulttyq qordan tólem aýdarylmaidy.
Eger balańyzdyń derekteri eGov-ta joq bolsa, platformada «balany qosý» degen batyrma bar.
Sony basyp, balanyń JSN nómirin engizý arqyly tirkeýge bolady.
Al tirkeý kezinde aqparattar shyqpai jatsa, «túzetý» batyrmasyna ótip, óz qujatyńyzdy, balalaryńyzdyń týý týraly kýáligin engizesiz.
• Ulttyq qordan balalarǵa bólinetin jinaq salyqtan bosatylady.
• Ata-analar eshqandai qujat jinamaidy, óitkeni protsess tutas avtomattandyrylǵan.
• Biryńǵai jinaqtaýshy zeinetaqy qory Ádilet ministrligimen birlesip, tiisti integratsiialyq jumys júrgizip otyrady.
• Bala 18 jasqa tolǵannan keiin shottaǵy qarajaty 10 jyl saqtalady. Osy 10 jyl ishinde shottaǵy qarajat talap etilmegen jaǵdaida sol adamnyń zeinetaqy shotyna aýdarylady.
• Bala shotyndaǵy aqsha dollarmen saqtalyp, 18-ge tolǵannan keiingi 10 jyl ishinde talap etken ýaqyttaǵy baǵam boiynsha teńgemen aýdarylady.
• Aqsha aýdarý jolymen ǵana paidalanylady, qolma-qol berilmeidi.
