© Photo: Unsplash/لەو ريۆاس
2024 جىلدىڭ 1 قاڭتارىنان باستاپ «ۇلتتىق قور – بالالارعا» جوباسى رەسمي قولدانىسقا ەندٸ. الدىن الا مەلٸمەت بويىنشا, جوبا العاشقى جىلدىڭ ٶزٸندە 7 ميلليوننان استام بالانى قامتيدى, دەپ حابارلايدى Kazinform اگەنتتٸگٸ.
ۇلتتىق قوردى باسقارۋ ۇلتتىق بانكتٸڭ قۇزىرىنداعى شارۋا بولعانمەن, «ۇلتتىق قور — بالالارعا» جوباسىنىڭ ٷيلەستٸرۋشٸسٸ — قارجى مينيسترلٸگٸ.
ال وپەراتور — بٸرىڭعاي جيناقتاۋشى زەينەتاقى قورى.
ەدٸلەت مينيسترلٸگٸنٸڭ بازاسىنداعى دەرەك نەگٸزٸندە 2024 جىلدىڭ 1 قاڭتارىنداعى جاعداي بويىنشا 18-گە تولماعان بالالاردىڭ تٸزٸمٸ جاسالادى.
سول تٸزٸم نەگٸزٸندە ۇلتتىق قوردىڭ ينۆەستيتسييالىق تابىسىنىڭ تەڭ جارتىسىن نەشە بالاعا تەڭدەي بٶلۋ كەرەكتٸگٸ بەلگٸلٸ بولادى.
2024 جىلدىڭ 1 اقپانىندا وسى ەسەپ نەگٸزٸندە 18-گە تولماعان بالالاردىڭ بەرٸنە بٸردەي مٶلشەردە اقشا اۋدارىلا باستايدى.
18 جاسقا تولعان سوڭ بالا ۇلتتىق قوردان تٷسكەن تٶلەمدٸ تۇرعىن ٷي ساتىپ الۋعا, بٸلٸم الۋعا, ونىڭ ٸشٸندە شەتەلدە بٸلٸم الۋ مٷمكٸندٸگٸنە جۇمساي الادى.
بٸراق باسپانانى تەك قازاقستان اۋماعىنان ساتىپ الۋى كەرەك.
ۇلتتىق قور تٶلەمٸن اۋدارۋ بالا قايتىس بولعان جاعدايدا توقتاتىلادى. بۇل جاعدايدا مۇراگەرلٸك قۇقىعى كٷشٸنە ەنەدٸ.
ونداي بالانىڭ مۇراگەرٸ كٸم بولا الاتىنى ازاماتتىق كودەكستٸڭ ايرىقشا بٶلٸگٸندە كٶرسەتٸلگەن, ياعني ەر بالانىڭ مۇراگەرٸ ناقتى جاعدايى بويىنشا انىقتالادى.
ال زاڭدى مۇراگەر بالادان قالعان اقشانى ٶز قالاۋىنشا پايدالانادى.
بالا قازاقستان ازاماتتىعىنان ايىرىلعان كەزدە ۇلتتىق قوردان تٶلەم اۋدارىلمايدى.
ەگەر بالاڭىزدىڭ دەرەكتەرٸ eGov-تا جوق بولسا, پلاتفورمادا «بالانى قوسۋ» دەگەن باتىرما بار.
سونى باسىپ, بالانىڭ جسن نٶمٸرٸن ەنگٸزۋ ارقىلى تٸركەۋگە بولادى.
ال تٸركەۋ كەزٸندە اقپاراتتار شىقپاي جاتسا, «تٷزەتۋ» باتىرماسىنا ٶتٸپ, ٶز قۇجاتىڭىزدى, بالالارىڭىزدىڭ تۋۋ تۋرالى كۋەلٸگٸن ەنگٸزەسٸز.
• ۇلتتىق قوردان بالالارعا بٶلٸنەتٸن جيناق سالىقتان بوساتىلادى.
• اتا-انالار ەشقانداي قۇجات جينامايدى, ٶيتكەنٸ پروتسەسس تۇتاس اۆتوماتتاندىرىلعان.
• بٸرىڭعاي جيناقتاۋشى زەينەتاقى قورى ەدٸلەت مينيسترلٸگٸمەن بٸرلەسٸپ, تيٸستٸ ينتەگراتسييالىق جۇمىس جٷرگٸزٸپ وتىرادى.
• بالا 18 جاسقا تولعاننان كەيٸن شوتتاعى قاراجاتى 10 جىل ساقتالادى. وسى 10 جىل ٸشٸندە شوتتاعى قاراجات تالاپ ەتٸلمەگەن جاعدايدا سول ادامنىڭ زەينەتاقى شوتىنا اۋدارىلادى.
• بالا شوتىنداعى اقشا دوللارمەن ساقتالىپ, 18-گە تولعاننان كەيٸنگٸ 10 جىل ٸشٸندە تالاپ ەتكەن ۋاقىتتاعى باعام بويىنشا تەڭگەمەن اۋدارىلادى.
• اقشا اۋدارۋ جولىمەن عانا پايدالانىلادى, قولما-قول بەرٸلمەيدٸ.
