«Partiialyq emes baiqaý ortalyǵy» respýblikalyq qoǵamdyq birlestiginiń jergilikti ókilderi ákimder sailaýynda zańbuzýshylyq tirkelmegenin aityp jatyr, dep habarlaidy QazAqparat.
«Búgin aýyl ákimderiniń sailaýy ótip jatyr. Barlyq aýylda emes, tek ákimderdiń ókilettigi aiaqtalǵan aýyldarda ǵana. Al biz baiqaýshylardyń jumysyn uiymdastyrdyq. Baiqaýshylardy neǵurlym jergilikti turǵyndar arasynan tarttyq. Olar búgin baiqaýshy bolǵanymen, erteń sol aýylda qarapaiym turǵyn retinde ómir súredi. Sondyqtan sailaýdyń burmalaýsyz ótýine múddeli», - dep jazdy Partiialyq emes baiqaý ortalyǵy ShQO filialynyń tóraǵasy Aiaýjan Áshimova Instagram paraqshasynda.
Osy ortalyq atynan №726 sailaý ýchaskesindegi jaǵdaidy baqylaǵan Anarhan Qabletova halyqtyń belsendi atsalysyp jatqanyn aitady.
«Daýys berý jalǵasyp jatyr. Adamdar belsendilik tanytyp, óz tańdaýyn jasaýda. Eshqandai quqyq buzýshylyq oryn alǵan joq», - deidi Partiialyq emes baiqaý ortalyǵynyń ókili.
Aqmola oblysynyń Shortandy aýdanynda 9 eldi mekenniń ákimi búgingi sailaý nátijesinde belgili bolady.
«Shortandy aýdanynda búgin tórt aýyldyq okrýg – onyń ishinde toǵyz eldi mekeniniń ákimderi tikelei sailaý arqyly anyqtalady. Aýdandyq aýmaqtyq sailaý komissiiasynyń málimetinshe, aýdandaǵy 4 sailaý okrýginde 14 kandidat tirkelgen. Onyń ishinde 4 úmitker Nur Otan partiiasynyń atynan tússe, 10 úmitker ózin-ózi usynǵan. Daýys berý Novokýbanka, Andreevka, Prigorodnyi jáne Bozaiǵyr aýyldyq okrýgterinde ótýde», - deidi Shortandydaǵy beitarap baiqaýshylar.
Partiialyq emes baiqaý ortalyǵynyń Shyǵys Qazaqstan oblysy Katonqaraǵai aýdanyndaǵy Órel aýyldyq okrýgi boiynsha baiqaýshysy Aqbota Shákirtova daýys berý áli jalǵasyp jatqanyn, eń bastysy, barlyq sanitarlyq talaptar saqtalǵanyn aitady.
«Sailaýda daýys berý – ár adamnyń quqyǵy. El keleshegine beijai qaramaityn azamat tańdaý jasaidy. Bul sailaý basqa sailaýlarǵa qaraǵanda ózgerek. Halyq aýyldyń ákimin ózi sailaidy. Eger úmitkerlerdiń qai-qaisysyna da kóńili tolmasa, «Bárine qarsymyn» degen baǵanǵa belgi qoiýǵa múmkindigi bar. Aýyl turǵyndary ózderi tanityn úmitkerge daýys berip jatyr», - dep jazdy Madiiar Seisekeev esimdi baqylaýshy.
Kókshetaý qalasy ardagerler keńesiniń tóraǵasy Shiiap Áliev te sailaýshylardyń arasynda bolyp, halyqpen sóilesip qaitqanyn aitady.
«Halyqtyń belsendiligi ótken sailaýlarǵa qaraǵanda edáýir artty. Sailaý kúni aýyl turǵyndarynyń saiasi ómirge belsendiligi, olardyń eń aldymen ózderiniń eldi mekenderiniń bolashaǵyna jaýapkershiligikpen qarap, aiqyn tańdaý jasaitynyn múltiksiz ańǵarýǵa bolady. Óziniń 30 jyldyq tarihynda táýelsiz Qazaqstan Respýblikasy áleýmettik-ekonomikalyq jaǵynan báigege keiin qosylsa da, qanatty júirik tulpardai biraz elderdi qýyp jetip, tipti keibireýlerinen ozyq turatyn jaǵdaiǵa jetti. Osynyń bir aiǵaǵy retinde joǵary deńgeide uiymdastyrylǵan búgingi ótip jatqan saiasi naýqan – aýyldar men aýyldyq okrýgter ákimderiniń tikelei sailaýy», - degen qoǵam qairatkeri 2021 jyldyń 25 shildesi tarihta orny erekshe kún bolyp qalatynyn aitty.
«Óitkeni bul kún – aýyl turǵyndary óz eldi mekeniniń keleshegine, adami qasietpen bolashaqqa úlgi kórsetip, qalaýlysyn dep taýyp daýys bergen kún. Barlyq sailanatyn úmitkerlerge sáttilik, egemendi elimizdi damytý jolyndaǵy igilikti, aýqymdy isterine sáttilikter tileimin», - deidi ardagerler keńesiniń basshysy.
Almaty oblysynyń «Azamattyq Aliansy» qaýymdastyǵynyń atynan №551 sailaý ýchaskeskinde baiqaýshy bolyp qatysyp jatqan Juldyz Temirbekova daýys berý protsesi barlyq talaptarǵa sai ótip jatqanyn aitqan.
«Sailaý ýchaskesiniń jumysy qalypty júrip jatyr. Daýys berý protsesi barlyq talaptarǵa sai júrgizilýin qadaǵalaimyn jáne sizdermen sailaý ýchaskesindegi jańalyqtarmen bólisip otyramyn», - deidi baiqaýshy.
