15 tamyzda aty ańyzǵa ainalǵan sazger, qazaq valsiniń koroli Shámshi Qaldaiaqovtyń týǵanyna 90 jyl tolady. Onyń uly Muhtar Qaldaiaqov halyq ártisiniń ómiri men otbasylyq qundylyqtary týraly aityp berdi, dep jazady QazAqparat.
Bolashaq halyq kompozitory 1930 jyly 15 tamyzda eldiń ońtústigindegi shaǵyn aýylda dúniege keldi. Onyń ákesi zerger, temir ustasy bolǵan. Desek te, ónerden de qury qol emes edi. Qazaqtyń qobyzy men dombyrasyn quiqyljyta tartatyn seri adam. Anasy da án salatyn. Shámshi bala kezinen ónerge beiim boldy. Kishkentaiynan mandolinada oinap, alǵashqy ánderin jaza bastady.
«Ákem Timýr sovhozynda, qazirgi Túrkistan oblysynyń Shámshi aýylynda dúniege keldi. Ol árdaiym: «Men ataqty qolbasshy, batyr aqsaq Temir qaitys bolǵan jerde týdym», - dep aityp otyratyn. Ol dúniege kelgende atyn Jámshid dep qoiǵan. Keiin Shámshi bolyp ketti. Atamnyń shyn esimi Ánápiia. Aiaǵynda týa bitken úlken qal bolǵan. Sondyqtan Qaldyaiaq bolyp ketti. Búginde onyń laqap aty ańyzǵa ainaldy ǵoi»,– deidi Muhtar Qaldaiaqov.
Shámshi Qaldaiaqovtyń balǵyn balalyq shaǵy qiyn-qystaý kezeńge tuspa-tus keldi. Ekinshi dúniejúzilik soǵysta 15 jastaǵy bozbala traktorshy bolyp jumys istedi. Keiin tehnikalyq ýchilishede veterinar mamandyǵy boiynsha oqydy. Sodan keiin Aqtóbe oblysyna qarasty bir aýylda eńbek etti.
