Búgin - HH ǵasyrdyń basynda talaidy sarsańǵa salyp, qasiret shektirgen saiasi qýǵyn-súrgin qurbandaryn eske alý kúni, - dep habarlaidy «Ult aqparat».
Dál osy kúni 1920 jyldardyń sońynda jáne 1932-1933 jyldar aralyǵynda qasaqana uiymdastyrylǵan jasandy zaýaldan zardap shekkenderdi de eske alamyz.
Qazaqstan Respýblikasynyń Tuńǵysh Prezidenti - Elbasy Nursultan Nazarbaevtyń Jarlyǵymen 1997 jyldan bastap atap ótilip kele jatqan saiasi qýǵyn-súrgin qurbandaryn eske alý kúni Qazaqstan úshin airyqsha mánge ie.
«Halyq jaýlaryn» anyqtaý boiynsha qatań saiasattyń saldarynan qýǵyn-súrginge ushyraǵandardyń ózderi ǵana emes, olardyń jaqyndary da zardap shekti. Qazaqstanda 103 myńnan astam adam qýǵyn-súrginge ushyrady, 25 myńnan astamy atý jazasyna kesildi. Jazyqsyz jazalanǵandardyń qatarynda Á. Bókeihan, A. Baitursynuly, M. Tynyshbaev, M. Dýlatuly, T. Rysqulov, M. Jumabaev, S. Seifýllin, I. Jansúgirov, B. Mailin, S. Asfendiiarov siiaqty kórnekti memleket jáne qoǵam qairatkerleri, ǵalymdar, mádeniet jáne saiasat salasynyń qairatkerleri boldy.
Osynaý qazaq halqy úshin ataýly data qarsańynda, keshe Memleket basshysy Qasym-Jomart Toqaev Qazaqstan halqyna úndeý jariialap, saiasi qýǵyn-súrgin qurbandaryn aqtaý úshin arnaiy memlekettik komissiia qurýdy tapsyrǵanyn jariia etken bolatyn. «Biz jazyqsyz jazalanǵandardyń árqaisysyn este saqtaý arqyly ǵana kemel keleshekke jol ashamyz. Bolashaqtyń berik negizi Táýelsizdikten bastaý alady. Ótken ǵasyrdaǵy eń qily kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz», - degen edi Qazaqstan Prezidenti.
