Búgin Qazaqstanda Otan qorǵaýshy kúni atap ótiledi.
26 jyl buryn memleket basshysy Nursultan Nazarbaevtyń Jarlyǵymen Qazaqstan Respýblikasynyń Qarýly kúshteri quryldy.
1992 jyldyń 7 mamyrynda táýelsiz eldiń zańdyq quqyqtarynyń negizderine jáne táýelsiz memleketter dostyǵyna qatysýshy memleketter arasyndaǵy qol jetken kelisimderge bailanysty QR Prezidenti Nursultan Nazarbaevtyń Jarlyǵy shyqty. Bul jarlyq boiynsha Qazaqstan aýmaǵynda ornalasqan Qarýly kúshter ózderiniń múlikterimen qosa respýblikanyń qaraýyna ótti. Joǵarǵy Bas qolbasshy retinde qarýly kúshterdi basqarýdy prezident óz moinyna aldy. Bul kún Qazaqstan Respýblikasynyń Qarýly Kúshteriniń qurylǵan kúni bolǵandyqtan "7 mamyr — Otan qorǵaýshylar kúni" dep jariialandy.
2012 jylǵy 3 mamyrda Nursultan Nazarbaevtyń «Qazaqstan Respýblikasy Qarýly Kúshteriniń 20 jyldyǵy týraly» Buiryǵy negizinde «Otan qorǵaýshy kúni» bekitilip, onyń qurmetine 2013 jyly Astanada tuńǵysh ret jaýyngerlik parad ótti. Oǵan 7 myńnan astam áskeri qyzmetshi, 400 birlikten asa áskeri tehnika, 86 ushaq pen tikushaq tartylǵan edi.
QR Qarýly Kúshteri qurylǵaly beri Qorǵanys ministrliginiń basshylyǵynda Saǵadat Nurmaǵambetov (1992-1995), Álibek Qasymov (1995-1996), Muhtar Altynbaev (1996-1999 jáne 2001-2007), Sát Toqpaqbaev (1999-2001), Danial Ahmetov (2007-2009), Ádilbek Jaqsybekov (2009-2014), Serik Ahmetov (2014), Imanǵali Tasmaǵambetov (2014-2016) boldy. 2016 jyldyń qyrkúiek aiynan bastap bul jaýapty mindetti general-polkovnik Sáken Jasuzaqov atqaryp keledi.
Dástúr boiynsha meiram qarsańynda prezident áskeri ataqtar men joǵary shender berý týraly jarlyq shyǵaryp, eren eńbegimen erekshelengen úzdikterdi marapattady.
Biyl Otan qorǵaýshylar kúnine jáne Uly Jeńiske arnalǵan áskeri sherý Jambyl oblysyndaǵy "Otar" áskeri bazasynda ótti.
