Búgin Táýelsiz Qazaqstannyń memlekettik rámizderi - Memlekettik tý, Memlekettik eltańba jáne Memlekettik gimn kúni.
Osydan týra 28 jyl buryn, naqty aitqanda 1992 jyldyń 4 maýsymynda QR Tuńǵysh Prezidenti - Elbasy Nursultan Nazarbaev «Qazaqstan Respýblikasynyń Memlekettik týy týraly», «Qazaqstan Respýblikasynyń Memlekettik eltańbasy týraly» jáne «Qazaqstan Respýblikasy Memlekettik ánuranynyń mýzykalyq redaktsiiasy týraly» Zańdarǵa qol qoiǵan edi. Al «Qazaqstan Respýblikasynyń Memlekettik rámizderi týraly» Konstitýtsiialyq Zań 2007 jyly 4 maýsymda qabyldandy. Osy Zańǵa sáikes jyl saiyn 4 maýsym Qazaqstan Respýblikasynda Memlekettik rámizder kúni retinde merekelenedi.
Memlekettik rámizder – bul kez kelgen memlekettiń egemendigi men birtutastyǵyn beineleitin, onyń ajyraǵysyz atribýttarynyń biri. Qazaqstan Respýblikasynda Memlekettik tý, Memlekettik eltańba jáne Memlekettik gimn memlekettik rámizder bolyp sanalady.
Osynaý memlekettik úsh nyshandy tańdaý úshin 1992 jyldyń basynda Joǵarǵy Keńes prezidiýmy jumys tobyn quryp, arnaiy shyǵarmashylyq komissiia taǵaiyndady. Onyń quramyna Salyq Zimanov, Erbol Sháimerdenov, Serikbolsyn Ábdildin, Serik Ábdrahmanov syndy qairatkerler kirdi. Osydan keiin búkil Qazaqstan kóleminde Eltańba, Tý, Ánuran nusqalaryna konkýrs jariialandy. Bir ǵana týdyń ózine 600 adamnan 1 200 nusqa tússe, Eltańbanyń 245 jobasy, ánurannyń 750 úlgisi baiqaýǵa qatysty.
Estetikalyq sipatymen de, tarihi, saiasi, ekonomikalyq simvolizmge sáikes kelýi boiynsha da úzdik týyndy usynǵan baiqaý jeńimpazdaryn qazir halyq memlekettik nyshan avtorlary retinde tanidy.
Atap aitqanda, Qazaqstan Respýblikasynyń Memlekettik týy. Týdyń avtory - Qazaqstannyń eńbek sińirgen óner qairatkeri Sháken Niiazbekov.
Elimizdiń memlekettik týy – ortasynda shuǵylaly kún, onyń astynda qalyqtap ushqan qyran beinelengen tik buryshty kógildir tústi mata. Týdyń sabynyń tusynda ulttyq órnek tik jolaq túrinde naqyshtalǵan. Kún, onyń shuǵylasy, qyran jáne ulttyq órnek beinesi altyn tústes. Týdyń eni men uzyndyǵynyń araqatynasy - 1:2.
Qazaqstan Respýblikasy Memlekettik eltańbasynyń avtorlary – belgili sáýletshiler Jandarbek Málibekov pen Shot-Aman Ýálihanov.
Qazaqstan Respýblikasynyń Memlekettik eltańbasy – dóńgelek nysandy jáne kógildir tús aiasyndaǵy shańyraq túrinde beinelengen, shańyraqty ainala kún sáýlesindei tarap ýyqtar shanshylǵan. Shańyraqtyń oń jaǵy men sol jaǵynda ańyzdardaǵy qanatty pyraqtar beinesi ornalastyrylǵan. Joǵarǵy bóliginde – bes buryshty kólemdi juldyz, al tómengi bóliginde «QAZAQSTAN» degen jazý bar. Juldyzdyń, shańyraqtyń, ýyqtardyń, ańyzdardaǵy qanatty pyraqtardyń beinesi, sondai-aq «QAZAQSTAN» degen jazý – altyn tústes.
Qazaqstan Respýblikasynyń Memlekettik Týy men Memlekettik Eltańbasynyń etalondary Qazaqstan Respýblikasy Prezidentiniń Rezidentsiiasynda saqtalady.
Táýelsiz Qazaqstannyń tuńǵysh Ánurannyń avtorlary retinde - áýenin jazǵan Muqan Tólebaev, Evgenii Brýsilovskii men Latif Hamididiń esimi tarihta qaldy. Úzdik mátinge jariialanǵan baiqaýdy Muzafar Álimbaev, Qadyr Myrzaliev, Tumanbai Moldaǵaliev jáne Jadyra Dáribaeva jeńip shyqty.
2006 jyly «Meniń Qazaqstanym» áni retinde tanymal bolǵan Qazaqstannyń gimni Prezident Nursultan Nazarbaevtyń bastamasymen 2006 jyly 6 qańtarda elimizdiń Parlamentinde bekitildi. Birinshi ret ol 2006 jyly 11 qańtarda Tuńǵysh Prezident, Elbasynyń saltanatty ulyqtaý rásiminde oryndaldy. Ánniń avtory Shámshi Qaldaiaqov, sózin jazǵandar: Jumeken Nájimedenov, Nursultan Nazarbaev.
