Sýret: Qazaqstan.tv
Biyl memlekettigimizdiń simvoldarynyń qabyldanǵanyna 32 jyl toldy. 1992 jyldyń basynda memlekettik úsh nyshan – Tý, Eltańba jáne Ánurandy tańdaý úshin Joǵarǵy keńes prezidiýmy jumys tobyn quryp, arnaýly shyǵarmashylyq komissiia taǵaiyndady. Onyń quramyna Salyq Zimanov, Erbol Sháimerdenov, Serikbolsyn Ábdildin, Serik Ábdrahmanov jáne basqa da qairatkerler kirdi. Osydan keiin búkil Qazaqstan kóleminde Eltańba, Tý, Ánuran nusqalaryna konkýrs jariialandy.
Týdyń ózine 600 adamnan 1 200 nusqa, Eltańbanyń 245 jobasy jáne ánurannyń 750 úlgisi baiqaýǵa qatysty. Estetikalyq sipatymen de, tarihi, saiasi, ekonomikalyq simvolizmge sáikes kelýi boiynsha da úzdik týyndy usynǵan baiqaý jeńimpazdaryn qazir halyq memlekettik nyshan avtorlary retinde tanidy.
Olar:
- Tý avtory: Sháken Niiazbekov
- Eltańba avtorlary: Jandarbek Málibekov pen Shota Ýálihanov
Sonymen qatar Táýelsiz Qazaqstannyń tuńǵysh ánuran avtorlary retinde áýenin jazǵan Muqan Tólebaev, Evgenii Brýsilovskii men Latif Hamididiń esimi tarihta qaldy. Úzdik mátinge jariialanǵan baiqaýda Muzafar Álimbaev, Qadyr Myrzaliev, Tumanbai Moldaǵaliev jáne Jadyra Dáribaeva jeńiske jetti. Keiin, 2006 jyly, jańa memlekettik gimn qabyldandy. Tańdaý el arasynda keńinen tanymal «Meniń Qazaqstanym» ánine tústi. 1956 jyly sazger Shámshi Qaldaiaqov pen Jumeken Nájimedenovtiń shyǵarmashylyq tandeminen shyqqan týyndynyń bastapqy mátinin Tuńǵysh Prezident Nursultan Nazarbaev óńdedi.
2006 jyly 6 qańtarda Qazaqstan Parlamenti jańa memlekettik gimndi bekitti. Birinshi ret ol 2006 jyly 11 qańtarda Memleket basshysynyń saltanatty ulyqtaý rásiminde oryndaldy.
2007 jyly 4 maýsymda qabyldanǵan «Qazaqstan Respýblikasynyń Memlekettik rámizderi týraly» Konstitýtsiialyq Zańǵa sáikes jyl saiyn 4 maýsym Qazaqstan Respýblikasynda Memlekettik rámizder kúni retinde merekelenedi.
Aita keterligi, osy jyldyń 15 naýryzynda Atyraýda ótken Ulttyq quryltaiynda Memleket basshysy Qasym-Jomart Toqaev Qazaqstannyń jańa Eltańbasynyń jobasyn jasaýǵa ashyq baiqaý jariialanatynyn aitqan edi.
«Eltańbamyzǵa qatysty syni pikirler aitylyp jatady. Ony Keńes zamanyndaǵy gerbke uqsatyp jatady. Tym eklektikalyq, kúrdeli deidi. Mundai oidy el isine bei-jai qaramaityn belsendi azamattar ǵana emes, mamandar da aityp júr. Oryndy paiymdar eskerýsiz qalmaýy kerek. Ortaq kelisimge kelgen jaǵdaida arnaýly komissiia qurýǵa bolady. Bul komissiia máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baiqaý jariialanady», - dedi Qasym-Jomart Toqaev.
Sál keiinirek Qarjy ministri Mádi Takiev Eltańbany aýystyrýǵa qatysty oń sheshim qabyldanǵan jaǵdaida ǵana shyǵystaryna bailanysty qalǵan jaittar qarastyrylatynyn atap ótti.
Al Memlekettik keńesshi Erlan Qarin Jibek Joly telearnasyndaǵy «Ýáde» baǵdarlamasyna bergen suhbatynda Memleket basshysy óz sózinde «Eltańbany aýystyrýǵa qatysty ártúrli pikirdiń aitylatynyn, eger qajet bolsa, komissiia quryp talqylaý qajettigin, oń sheshim qabyldansa baiqaý jariialaý kerektigin» ǵana aitqanyn alǵa tartty.
«Memleket basshysy Eltańbany mindetti túrde aýystyrý kerek degen pikir aitqan joq. Ókinishke orai, kópshiligi málimdemeni durys qaramaidy, oqymaidy, tyńdamaidy. Shyn mánisinde, Prezident ol jerde qoǵamda keibir azamattyń Eltańbaǵa qatysty ártúrli pikir aityp júrgenin, máselege qatysty ustanym qalyptassa, onda ashyq túrde talqylaý kerektigi týraly pikir aitty», - deidi ol.
