Foto: akorda.kz
Búgin Qazaqstannyń meditsina salasynyń ókilderi kásibi merkelerin atap ótedi. Elimizde maýsymnyń ər úshinshi jeksenbisi – meditsina qyzmetkerleriniń kúni. Bul kúndi atap ótý QR Prezidentiniń 1998 jylǵy Jarlyǵymen belgilendi.
Osyǵan orai Aqordada Memleket basshysy elimizdiń meditsina qyzmetkerlerin kásibi merekesimen quttyqtady.
Prezidenttiń Jarlyǵymen otandyq meditsinany damytýǵa eleýli úles qosqan mamandar marapattaldy.
– Rasynda, dáriger bolý – júrektiń isi. Bul – ekiniń biri aiaq basa bermeitin júgi aýyr, kúrdeli jumys. Meditsina qyzmetkerleri – ult saýlyǵynyń saqshylary, eń qadirli mamandyq ieleri. Ásirese, jahandyq indet, iaǵni kovid kezinde búkil el dárigerlerdiń adal qyzmetine kýá boldy. Kúrdeli kezeńde meditsina mamandary myńdaǵan adamdy qutqaryp qaldy. Biz abzal jandardyń tabandy eńbegin baǵalaimyz. Olardyń qaisarlyǵyn maqtan tutamyz. «Bir adamnyń ómirin qutqarý barsha adamzatty qutqarýmen birdei». Dárigerler ota kezinde, aýrýhana palatasynda kún saiyn erlik jasaidy desek, artyq bolmaidy. Jedel járdem kóliginde adam ómirine arasha túsetin sátter bolady. Sondyqtan sizder, qurmetti meditsina qyzmetkerleri, beibit kúnniń batyrlary degen atqa laiyqsyzdar. Men barsha meditsina mamandaryna zor rizashylyǵymdy bildiremin, – dedi Qasym-Jomart Toqaev.
Búginde elimizdiń densaýlyq saqtaý salasynda 380 myńǵa jýyq adam jumys isteidi. Ár mamannyń eńbegi orasan zor. Ult saýlyǵyn saqtaýǵa búkil ómirin arnaǵan tutas áýletter bar.
Jyl saiyn 45 memleketten shamamen 10 myń adam Qazaqstanǵa emdelý úshin arnaiy keledi. Bul elimizdegi dárigerlik kómektiń sapasy joǵary ekenin kórsetedi.
Aita keteiik, elimizde ortasha ómir súrý uzaqtyǵy 75,4 jasqa jetti. Meditsinalyq nysandar qatary kóbeiip, tehnikalyq bazasy nyǵaitylyp jatyr.
- Bes jylda 800-ge jýyq densaýlyq saqtaý nysany, iaǵni kóptegen emhana men aýrýhana salyndy. Bul jumys toqtamaidy, memleket aldaǵy ýaqytta da infraqurylymdy damyta beredi. Ult saýlyǵyn jaqsartý alǵashqy meditsinalyq kómekten bastalady. Elimizde aýyldyq jerdegi meditsina júiesin jańǵyrtýǵa arnalǵan ulttyq joba júzege asyrylyp jatyr. Búginde 469 ǵimarat boi kóterdi. Jyl sońyna deiin taǵy 186 nysan salynady. Aýdandyq aýrýhanalar zamanǵa sai quraldarmen jabdyqtalyp jatyr, – dedi Prezident.
Prezidenttiń tapsyrmasymen byltyrdan bastap «Qazaqstannyń eńbek sińirgen dárigeri» ataǵy berile bastady. Bul – meditsina qyzmetkerlerine degen airyqsha qurmettiń belgisi. Osy oraida Abai Baigenjin elimizde alǵash bolyp «Qazaqstannyń eńbek sińirgen dárigeri» ataǵyn aldy.
