5 qańtarda AQSh-tyń Kaliforniia shtatyndaǵy Los-Andjeles qalasynda «Altyn globýs» syilyǵyn tapsyrý rásimi ótedi. Bul syilyq osymen 77-shi ret kino jáne televidenie salasyndaǵy úzdik týyndylarǵa tabys etilmek, dep habarlaidy QazAqparat.
Ótken jylǵy «Altyn globýs» nominanttary 2019 jyldyń 9 jeltoqsanynda belgili bolǵan edi.
Saltanatty rásimdi NBC telearnasy tikelei efirden kórsetedi. Kesh júrgizýshisi – britandyq komik Riki Jerve.
Búgingi saltanatty keshte 25 sanat boiynsha nominanttar esimin Tim Allen, Dakota Fanning, Siýzen Kelechi Ýotson, HFPA prezidenti Lorentso Soriia, Dilan men Paris Brosnan, sondai-aq Berri Adelman jariialaidy.
«Altyn globýsta» Sesil B. De Mildiń arnaiy syilyǵyn Tom Henks alady, al Ellen Dedjeneres taiaýda ǵana taǵaiyndalǵan Kerol Bernett syilyǵyna ie bolady.
«Úzdik dramalyq film» atalymyna Todd Fillipstiń «Djoker», Martin Skorsezeniń «Irlandyq», Sem Mendestiń «1917», Noa Baýmbaktyń «Neke týraly hikaia» jáne Fernando Meirellishtiń «Qos áke» filmderi usynylyp otyr.
Búgingi sharada «Neke týraly hikaiada» basty róldi somdaǵan Skarlett Iohansson, «Daý-damaidaǵy» Sharliz Teron, «Kishkentai áielder» filminde oinaǵan Sirsha Ronan, «Djýdi» filminiń bas keiipkerin somdaǵan Rene Zellveger jáne «Garriettegi» Sintiia Erivo «úzdik aktrisa» ataný úshin baq synaidy.
Al «Úzdik akter» atalymyna nominanttar qatarynda Kristian Beil («Ford pen Ferrari»), Antonio Banderas («Qasiret men ataq»), Adam Draiver («Neke týraly hikaia»), Hoakin Feniks («Djoker») jáne Djonatan Prais («Qos áke») bar.
Úzdik animatsiialyq film nominatsiiasy úshin «Muzdy ólke-2», «Aidahardy qalai qolǵa úiretýge bolady-3», «Arystan patsha», «Joǵalǵan býyn» jáne «Oiynshyqtar hikaiasy-4» mýltfilmderi talasady.
Nominanttar tizimin júldeniń resmi saitynan kóre alasyzdar.
Aita keteiik, «Altyn globýs» syilyǵyn 1944 jyldan beri Gollivýdtyń sheteldik baspasóz qaýymdastyǵy tapsyryp keledi. Ol jyl saiyn 90-ǵa jýyq halyqaralyq jýrnalistiń daýys berý nátijesi boiynsha qańtar aiynda ótedi.
