Foto: primeminister.kz
Ǵylym jáne joǵary bilim ministri Saiasat Nurbek Úkimet otyrysynan keiin ótken brifingide Ǵylym akademiiasy qalai transformatsiialanyp jatqanyn aitty, dep habarlaidy Kazinform agenttigi.
«Qazir Ǵylym akademiiasyn transformatsiialaý júrip jatyr. Byltyr Prezident janyndaǵy Ǵylym akademiiasy qurylyp, mártebe berilgen. Qazir ǵylym týraly zańǵa tiisti ózgertýler engizip jatyrmyz. Keshe Prezident óz ókimimen Ǵylym akademiiasynyń jańa prezidentin taǵaiyndady. Erejesi daiyn. Jýyqta, eki-úsh aptanyń kóleminde jańa akademikterdi sailaýdy bastaimyz dep oilaimyn. Iaǵni, qazir Ǵylym akademiiasy qoǵamdyq uiym túrinde jumys istep tur. Ol joiylyp, jańa akademikterdi konkýrstyq negizde irikteý jumystary bastalady. Eńbegi sińgen, jyldar boiy ǵylymi úlesin dáleldep kele jatqan keibir akademikterge «Qurmetti akademik» mártebesi beriledi. Jańa akademiianyń jarǵysynda bul bar», - dedi ol.
Ministr akademikter irikteý konkýrsy múlde jańa ólshemsharttar boiynsha júretinin aitady.
«Mysaly, ǵylymi qyzmeti, Q1, Q2 impakt-faktory bar jýrnaldarda jariialanǵan maqalasynyń sany esepke alynady. Irikteý múlde jańa qaǵidattar boiynsha júredi. Ol qaǵidat ǵalymnyń jasyna emes, shynaiy ǵylymi úlesine, belsendiligine, patentter sanyna, ǵylymi jobalaryna, investitsiia tarta bilgenine qaraidy. Sondyqtan aldaǵy 2-3 aida akademiia shyndap transformatsiialanady. Jas boiynsha shekteý joq», - dedi Saiasat Nurbek.
