Aqtóbe oblysynyń ákimi Berdibek Saparbaev 5 maýsym kúni qarýly shabýyl jasalǵan qarý-jaraq dúkenderin aralady. Quqyq qorǵaý organdarymen birlese ótken tekserý kezinde «Pallada» dúkenindegi qarý saqtaý zańdylyqtarynyń tolyq oryndalmaǵany anyqtaldy. Keiin óńir basshysy qaýipsizdik talaby saqtalmasa, «Pallada» qarý-jaraq dúkenin jabý qajet ekenin aitty, dep habarlaidy Baq.kz tilshisi.
5 maýsym kúni tús mezgilinde qarýly top aldymen qala ortalyǵyndaǵy «Pallada» qarý-jaraq dúkenine shabýyl jasaǵan bolatyn. Dál osy jerde «Kúzet» qyzmetkeri Mirjan Tájibaev, zeinetker Nikolai Onishenko, satýshy Andrei Maksimenko qaza boldy. Tergeý kezinde belgili bolǵany, 18 qarý men ondaǵan oq-dárini lańkester esh qiyndyqsyz qolǵa túsirgen. Oqiǵadan soń «Pallada» dúkeniniń iesi Artem Gorlaev 1 jylǵa sottalyp, ol jazasyn qonys koloniiasynda ótep jatyr.
Aqtóbe oblysynda tekserý jumystary ári qarai jalǵasýda. Oblys ákimi Berdibek Saparbaev qaladaǵy «Pantera» jáne «Palllada» qarý-jaraq dúkenderine baryp, qaýipsizdik jumystaryn qarap shyqty. «Pantera» dúkeninde qajetti beinebaqylaý, dabyl túimesi, satylymdaǵy sýyq qarýlar men qarý-jaraqtardyń fotoreal dep atalatyn maketteri ornalasqan. Keiin oblys ákimi «Pallada» dúkenine bardy. Munda qarý saqtaý talaptary tolyq oryndalmai otyr.
«Eger sizder 5 maýsymǵa deiin qajetti qaýipsizdikti saqtaǵanda, jaǵdai bulai bolmas edi. Máselen, «Pantera» dúkeninde qaýipsizdik erejeleri saqtalyp otyr. Nege solardan qaramaisyzdar? Birneshe ret eskertý jasaldy. Sony nege oryndamaisyzdar? «Pantera» dúkenine baryńyz, qarańyz»,-dedi oblys ákimi Berdibek Saparbaev.
Aita keteiik, dúkenderde sýyq qarýdyń túpnusqasy emes, fotoreal turýy tiis. Eki qarýdyń bir-birinen aiyrmasy bolmaidy. Satyp alýshy, aldymen, maketin qarap, keiin keńseden IID-niń ruqsat qaǵazyn kórsetý arqyly qarýdy satyp alady. 5 maýsym kúni 3 adam qaza bolǵan «Pallada» qarý-jaraq dúkenin tekserý jumysynan soń oblys ákimi Berdibek Saparbaev dúken iesi qaýipsizdik erejelerin saqtamasa jabýdy, al oblystyq IID basshysy Mahambet Abisatovqa barlyq erejelerdiń saqtalýyn qadaǵalaýdy tapsyrdy.
Altynai SAǴYNDYQOVA
