Britaniianyń Esseks graftyǵynda 39 migranttyń júk kóliginen óli tabylýyna bailanysty Vetnam politsiiasy resmi túrde jeti adamǵa aiyp taqty, dep jazady BBC agenttigi.
Bes er adam men eki áiel zańsyz kóshi-qonmen ainalysqany úshin aiyptalyp jatyr, dep habarlaidy Hatin provintsiiasynyń politsiiasy.
Eske salaiyq, 2019 jyldyń 23 qazanynda Ulybritaniianyń Esseks graftyǵy Greis qalasynda kólik tońazytqyshynan 31 er adam men segiz áieldiń máiiti tabylǵan edi. Qazir Esseks politsiiasy Vetnamda júr.
Britaniia politsiiasynyń málimetinshe, adamdarǵa júk kóliginde aýa jetpei, tar jerde qatty ysyp ketken. Qaza tapqandardyń arasynda 26 jastaǵy Fam Thi Tra Mai bolǵan. Ol 22 qazanda otbasyna tynys ala almai jatqanyn aityp, hat joldaǵan.
Adamdardyń qaza tabýyna bailanysty birneshe adam tutqyndaldy, solardyń ishinde júk kóliginiń júrgizýshisi Arma graftyǵynyń turǵyny Moris Robinson da bar.
Qarasha aiynda Londondaǵy Ortalyq qylmystyq sotta ol zańsyz immigratsiiaǵa kómek kórsetý jáne qylmystyq múlikti satyp alý maqsatynda sóz bailasqanyn moiyndady.
Ulybritaniia politsiiasy adamdardyń qaza tabýyna bailanysty taǵy úsh adamǵa aiyp taqty. Olar 23 jastaǵy Imonn Harrison jáne Kristofer Kennedi, 49 jastaǵy George Nika.
