Táýelsiz britaniialyq sarapshy Qazaqstanda ótetin aldaǵy saiasi dodany sailaý júiesiniń damýyndaǵy taǵy bir jańa kezeń dep baǵalady. Shtattan tys redaktor jáne jýrnalist, postkeńestik qaqtyǵystar men saiasat jónindegi sarapshy Nil Vatson Qazaqstan Respýblikasynyń Parlamenti Májilisine depýtattar batystyq demokratiia úlgisinde tańdalatyndyǵyna senimdi, dep habarlaidy QazAqparat tilshisi.
Britaniialyq jýrnalisttiń aitýynsha, Qazaqstanda saiasi partiialardy qurý úshin múshe sanyn 40 myńnan 20 myńǵa deiin eki ese azaitý - pikir alýandyǵyn qamtamasyz etedi. Al partiialyq sailaý tizimderinde áielder men jastar úshin keminde 30% mólsherindegi kvotany engizý názik jandylar men jas býyn ókilderin belsendi bolýǵa jáne saiasi protsesterge qatysýǵa yntalandyrmaq. Nil Vatsonnyń paiymdaýynsha, aldaǵy sailaý Memleket basshysy Qasym-Jomart Toqaev uiytqy bolǵan «Halyq únine qulaq asatyn memleket» tujyrymdamasynyń ári qarai damýyna sebepshi bolady.
«Meniń kóńilimnen shyqqany, birqatar konstitýtsiialyq zańdarǵa túzetýler engizý arqyly parlamenttik oppozitsiia institýtyn qurý máselesi qolǵa alynyp otyr. Parlamenttik oppozitsiia quqyqtarynyń aýqymy meilinshe keńeiedi – olar jańarǵan parlamentte parlamenttik tyńdaý ótkizý jóninde bastama kóterý quqyǵyna ie bolady. Bul táýelsiz Qazaqstan batystyq úlgidegi demokratiiaǵa baǵyt alǵandyǵynyń belgisi», - dedi sarapshy.
Aita ketý kerek, Angliiada qazir – úshinshi jalpyulttyq lokdaýn. Londonda jáne Birikken Koroldiktiń kóptegen aimaqtarynda karantindik shekteýlerdiń eń joǵarǵy deńgeii jariialanǵan. Biraq Qazaqstannyń Ulybritaniiadaǵy Elshiligi jergilikti bilikten sailaý ótkizýge ruqsat alyp otyr. Sondyqtan Tumandy Albionda ýaqytsha turyp jatqan qazaqstandyqtar búgin, 10 qańtar kúni esh kedergisiz óz tańdaýyn jasai alady. Sailaý kezinde qatań sanitarlyq qaýipsizdik sharalary qolǵa alynyp, áleýmettik ara qashyqtyq meilinshe saqtalatyn bolady.
