Ulybritaniia premer-ministri Boris Djonson Eýropa odaǵynan Brekzitti (Eýroodaqtan shyǵý merzimi – red.) 31 qazannan keiingi ýaqytqa qaldyrýdy suramaidy. Bul týraly Djonson Eýrokomissiia basshysy Jan-Klod Iýnkermen Briýsselde kezdeskennen keiin onyń qorytyndysy jaily britan premeri keńsesi taratqan málimdemede aitylǵan.
Djonson qazannyń sońyna deiin Eýroodaqpen Brekzittiń jańa sharty jaily kelisimge kelemin dep úmittenedi. Ulybritaniianyń odaq quramynan shyǵýy jaily London men Briýssel arasyndaǵy kelissóz endi qarqyn alyp, kóp uzamai kún saiyn ótetin bolady dep jazylǵan málimdemede.
Biyl shilde aiynda Ulybritaniia premer-ministri qyzmetine kiriskeli beri Djonson Iýnkermen alǵash ret kezdesip, Briýsselde Brekzittiń máselesin talqylady.
Eýrokomissiia basshysynyń atynan taratylǵan málimdemede britan jaǵy buǵan deiin burynǵy premer Tereza Meidiń úkimetimen pysyqtalǵan kelisimdi ózgertýge bailanysty usynysyn áli bermegeni aitylǵan. Ulybritaniianyń Eýroodaqtan shyǵý sharty týraly kelisimdi britan parlamenti maquldamai tastaǵan. Meidiń ornyna kelgen Djonsonnyń kabineti Briýsseldi óz shartyna kóndirgisi keledi.
