Britan parlamenti qaýymdar palatasynyń jańa tóraǵasy bolyp leiborist Lindsi Hoil sailandy. Bul qyzmetti 2009 jyldan beri Djon Berkoý atqaryp kelgen.
Hoil daýys berý rásiminiń tórtinshi satysynda 325 depýtattyń daýysyn alyp, jeńiske jetti. Tóraǵa qyzmetine 7 kandidat talasty.
Alpys jeti jastaǵy Hoil parlamentke alǵash ret 1997 jyly sailanyp, 2010 jyldan tóraǵa orynbasary bolǵan.
Qaýymdar palatasy seisenbi kúni taratylady. Jeltoqsannyń 12-sine sailanatyn jańa quramy jańa tóraǵa sailaýyna bolady, alaida olai bolmaityny belgili bolyp otyr. Dástúr boiynsha tóraǵa parlamentke óz okrýginen balama kandidatsyz sailanady.
Djon Berkoý 31 qazanda ornynan túsken. Bul kún Britaniianyń Eýrodaqtan shyǵatyn kúni dep belgilense de, Brekzit taǵy da shegerilgen.
Tanymal ári yqpaldy saiasatker Berkoýdy sońǵy ailarda negizinen burynǵy partiialastary – konservatorlar "parlamenttegi birqatar protsedýralardy úkimet paidasyna jyǵyp berdi" dep synaǵan. Tóraǵa ustanymynyń arqasynda oppozitsiia premer Boris Djonsondy Brekzitti keiinge qaldyrý jóninde suraýǵa májbúrleitin zań qabyldaýǵa múmkindik alǵan edi.
