Beisenbi kúni Briýsseldegi sammitte EO-ǵa múshe 27 eldiń kóshbasshysy birneshe saǵat buryn qabyldanǵan Ulybritaniiany Eýroodaqtan shyǵarý týraly kelisimdi maquldady, dep habarlaidy QazAqparat.
Budan bylai atalmysh kelisim eýropalyq jáne britandyq parlamentterdiń tarapynan qoldaýǵa muqtaj. Ulybritaniianyń zań shyǵarýshylary senbi kúni qujatty bekitý máselesin qarastyrý úshin jiynda bas qosady.
Sondai-aq, shyǵý týraly kelisim jobasy eki jyldyq ótpeli kezeńdi qamtidy. Bul ýaqyt aralyǵynda EO-nyń barlyq qabyldanǵan saýda kelisimderi Ulybritaniiada qoldanys tabatyn bolady.
London Eýroodaqtan «mámile jasaspai» shyǵatyn bolsa, Ulybritaniia EO men ózge elder arasyndaǵy árekettegi sharttardyń bir bólshegi retinde sanalmaityn bolady. Britandyqtarǵa Dúniejúzilik saýda uiymynyń erejelerine sáikes saýda júrgizýge týra keledi.
«Ulybritaniia Qazaqstanmen kelisimge otyrýǵa múddeli, sebebi britandyq biznes Qazaqstanǵa kóp investitsiia saldy, alaida memleket Eýroodaqtan «kelisimsiz» shyǵatyn bolsa, London úshin AQSh jáne ózge de ekonomikasy iri eldermen qarym-qatynas ornatý tiimdirek bolady», - dedi Aziiany zertteý jónindegi Eýropalyq institýttyń taldaýshysy Kalam Tomson.
Ulybritaniia Qazaqstannyń iri saýda seriktesteriniń TOP-10 qataryna kiredi. Sońǵy 13 jylda britandyqtar bizdiń elge 13 mlrd dollardan astam investitsiia quiǵan.
«Qazaqstanǵa Ulybritaniiamen jańa kelisimdi bekitý protsesin bastaýǵa týra keledi. Qazaqstan britandyq tizimde tur, alaida eń basynda bolmaýy múmkin», - dedi Tomson.
Suhbat berýshi Brexit-tiń kez kelgen stsenariii munaidyń baǵasyna asa qatty áser etpeitinin atap ketti.
Aziiany zertteý jónindegi Eýropalyq institýttyń ózge qyzmetkeri, aǵa taldaýshysy Alberto Tiýrkstra Eýraziialyq ekonomikalyq odaqqa múshe elder Brexit-tiń teris tájiribesin zertteýi kerek degen pikirdi qoldaidy.
«Qazirgi tańda Eýraziia ekonomikalyq odaǵyn Ózbekstan arqyly keńeitý týraly pikirtalas júrip jatyr. Alaida Eýraziia ekonomikalyq odaǵyn keńeitpes buryn ony nyǵaitýǵa kóbirek kóńil bólgen jón», - dedi ol.
