Braziliiada Rio-de-Janeironyń Petropolis taýly aýdandarynda nóser jańbyr jaýyp, kóshkin men sý tasqyny saldarynan qaza tapqandar sany 94-ke jetti, olardyń segizi – kámelettik jasqa tolmaǵandar.
Bul týraly QazAqparat reseilik TASS agenttigine silteme jasap habarlaidy.
Budan buryn 71 adamnyń qaza tapqany týraly habarlanǵan.
Qazirgi kezde qutqarýshylar úiindiler astynan 24 adamdy shyǵardy, 35 adam izdestirilip jatyr. Atalǵan jumystarǵa 400 qutqarýshy, 200 politsei, sonymen qatar áskeriler men eriktiler jumyldyrylǵan. Shtat gýbernatory Klaýdiý Kastrý seisenbi kúni keshten bastap tótenshe jaǵdai saldaryn joiý jónindegi vedomstvoaralyq kúshterdi úilestirý úshin qalaǵa keldi.
«Bul 1932 jyldan bergi jaýǵan eń qatty jańbyr boldy», - dep málimdedi gýbernator BAQ-qa.
Budan erterek jedel qyzmetter shamamen 190 kóshkin men 230 kishi apat týraly aqparat alǵan, 80 turǵyn úige zaqym kelip, olardyń kem degende 54-i tolyǵymen qiraǵan. Qalaǵa seisenbi kúni alty saǵat ishinde 260 mm jaýyn-shashyn túsken. Qala biligi qaraly kún jariialap, tótenshe jaǵdai rejimin engizdi. Sinoptikteriń boljaýynsha, jaqyn kúnderi taǵy da jaýyn-shashyn túspek.
Braziliia Prezidenti Jair Bolsonarý qazirgi kezde is-saparmen Máskeýde júr. Ol áleýmettik jelilerde tabiǵi apattan zardap shekkenderge kómek kórsetý, sonymen qatar áskerlerdi jumyldyryp, apat saldaryn joiý týraly buiryq berdi. Bolsonarý juma kúni Resei men Majarstanǵa saparynan oralǵannan keiin birden qalaǵa kelýi kerek. Bolǵan oqiǵaǵa bailanysty Resei basshysy Vladimir Pýtin kóńil aitty.
Braziliianyń soltústigi, ońtústigi men ońtústik-shyǵysynda jaz kezinde (jeltoqsannyń aiaǵy men naýryzdyń aiaǵy aralyǵy) mol jaýyn jaýady, qaýipti jaǵdai jyl saiyn qaitalanyp otyrady. Ol Amozoniiadaǵy ekvatorlyq ormandaǵy jyly ylǵaldy aýanyń ońtústik-shyǵys baǵytta Atlant muhityna qarai jyljýynan bolyp otyr. 2020 jyldyń qańtarynda eldiń ońtústik-shyǵysynda bolǵan tabiǵi apattan 66 adam qaza tapty. 2021 jylǵy qarasha – jańbyrly maýsymnyń basynan beri Baiia, Minas-Jerais, Rio-de-Janeiro jáne San-Paýlý shtattarynda 150-den asa adam qaza tapqan.
2011 jyly qańtarda kóshkin men sý tasqyny saldarynan Rio-de-Janeironyń taýly aýdandarynda 900-den asa adam qaitys bolyp, 100-ge jýyq adam iz-túzsiz joǵalǵan, 35 myń turǵyn úisiz qalǵan.
