Parlament Senatynyń jalpy otyrysynda Qazaqstan men Braziliia arasyndaǵy quqyqtyq qatynastarǵa bailanysty úsh zań qabyldandy, dep habarlaidy "Ult aqparat".
«Sizderge Qazaqstan men Braziliia arasyndaǵy: qylmystyq ister boiynsha quqyqtyq kómek, qylmyskerlerdi ekstraditsiialaý, sottalǵan adamdardy berý týraly úsh shartty ratifikatsiialaý maqsatynda kelip otyrmyz. Braziliiamen osyndai sharttar jasaý mańyzdy. Aita keteiin, Braziliia bizdiń táýelsizdigimizdi aldymen tanyǵan elderdiń biri. Jer shalǵai bolǵanymen ózara bailanys tyǵyz. Ýaqyt ótken saiyn qarym-qatynas damyp keledi. 2016 jyldan beri eki el arasynda vizasyz rejim ornaǵan. Sońǵy jyldary týrister sany kóbeiip keledi», - dedi Bas prokýrordyń orynbasary Marat Ahmetjanov.
Onyń sózine qaraǵanda, byltyr elimizge Braziliiadan 1 myńnan astam adam kelgen. Qazaqstannan da ol elge týrister men biznesmender barady.
«Degenmen, arasynda migratsiialyq zańdy buzatyndar, tipti qylmys jasaǵan faktiler bar. Qazir qazaqstandyq bir áiel sonda túrmede otyr», - dedi Bas prokýrordyń orynbasary.
Atalǵan sharttarǵa 2018 jyly Qazaqstanda qol qoiyldy.
«Birinshi, qylmystyq ister boiynsha quqyqtyq kómek týraly Shartqa toqtalaiyq. Ol Shart kúdikti adamnyń kinásin dáleldeý úshin qajetti tergeý amaldaryn júrgizýdi kózdeidi. Mysaly, tergeý amaldaryn júrgizý, kýá retinde aiǵaq alý, suraý salǵan jaǵdaida saraptama jasaý, aktivterdi qaitarý jáne basqalary. Shart boiynsha eki eldiń tergeý organdary ózara kelisip, bir-birine basqa da kómek bere alady», - dep túsindirdi M. Ahmetjanov.
Al, ekinshi shart ustap berý týraly qadamdaryna arnalǵan. Qujat izdeýde júrgen adamdardy qylmystyq jaýapqa tartý men sot úkimin oryndaý úshin ekstraditsiialaý máselesin retteidi. Shartta ustap berýdiń jáne odan bas tartýdyń naqty negizderi bekitilgen.
«Sottalǵan adamdardy berý týraly Shart olarǵa jazasyn elinde óteýge múmkindik jasaidy. Konstitýtsiianyń 11-shi baby boiynsha memleket ózinen tys jerde júrgen azamattaryn qorǵaýǵa jáne olarǵa qamqorlyq jasaýǵa kepildik beredi. Iaǵni, bizdiń azamatymyz shetelde qylmys jasasa, olardy qorǵaýǵa tiispiz», - dedi ol.
Belgili bolǵandai, sottalǵandar sany boiynsha Braziliia 23-shi, al, Qazaqstan 99-shy orynda. Braziliiada jazasyn jatqan qazaqstandyq áiel elimizge aýysý týraly ótinish berdi. Qazir bul ótinish qaralyp jatyr. Osy Shartty ratifikatsiialaǵan soń bul másele sheshimin tabady.
«Halyqaralyq sharttar týraly» Zańǵa sáikes bul sharttar ratifikatsiialaýǵa jatady. Sebebi azamattardyń quqyqtary men bostandyqtaryna tikelei qatysty. Sharttardy ratifikatsiialaý teris áleýmettik, ekonomikalyq jáne saiasi saldarǵa ákelmeidi. Respýblikalyq biýdjetten qosymsha qarajat talap etpeidi», - dedi Marat Ahmetjanov.
Senattyń jalpy otyrysynda «Qazaqstan men Braziliia arasyndaǵy qylmystyq ister boiynsha ózara quqyqtyq kómek týraly shartty ratifikatsiialaý týraly» Zańy, «Qazaqstan men Braziliia arasyndaǵy adamdardy ustap berý týraly shartty ratifikatsiialaý týraly» Zańy, «Qazaqstan men Braziliia arasyndaǵy sottalǵan adamdardy berý týraly shartty ratifikatsiialaý týraly» Zańy qabyldandy.
