QR Aýyl sharýashylyǵy ministri Erbol Qarashókeev ortalyq kommýnikatsiialar qyzmetinde ótken brifingte elge syrttan qant importtaýdaǵy qiyndyqtar baǵanyń sharyqtaýyna sebep bolǵanyn aitty, dep habarlaidy QazAqparat.
Ministrdiń aitýyna qaraǵanda, Braziliianyń qant zaýyttary qantty tek aldyn ala tóleý arqyly jáne úlken kólemde satady.
Sondyqtan qazir Eýraziia ekonomika odaǵynan tys naryqtan keletin ónimge táýeldi bolyp qalǵan Qazaqstan siiaqty elder eki ortada Louis Dreyfus Company siiaqty iri transulttyq kompaniialardyń deldaldyǵyna júginýge májbúr.
«Transulttyq kompaniialar Braziliiadan qantty 60 myń tonnadan satyp alyp, Qara teńiz porttaryna aparady. Sodan keiin ǵana Qara teńiz ailaǵynan TMD elderine qantty az kólemde jetkizedi. Kórshi elderdegi geosaiasi jaǵdaiǵa bailanysty týyndaǵan logistikalyq problemalar osy qanttyń óziniń keshigip jetýine túrtki boldy. Eger buryn Resei Federatsiiasy men Belarýs Respýblikasynan import kezinde aq qantty jetkizý merzimi 4-10 kúntizbelik kúnge deiin bolsa, qazirgi ýaqytta Resei Federatsiiasy qant áketýge tyiym salǵannan keiin úshinshi elderden qant jetkizý merzimi 90 kúnge uzardy», - dedi Erbol Qarashókeev.
Sondai-aq, ol qazirgi tańda álem boiynsha qant pen onyń shikizaty negizinen Braziliia men Úndistannan alynyp jatqanyn aitty.
«Olardyń óndiris kólemi shamamen 800 mln tonnany nemese álemdik naryqtyń shamamen 60%-yn quraidy. Braziliiadan qant pen quraq shikizatynyń importy Qara teńizdegi Grýziia porttary arqyly jetedi. Grýziia porttarynyń ótkizý qabiletiniń shekteýliligi, infraqurylym men kólik kemeleriniń jetkiliksizdigi kepteliske ákelip soqtyrýda. Úndistannan qant importy kezinde Hairaton Aýǵan shekara ótkelinde júkterdiń jinalýy baiqalady. Bul taýarlardy resimdeý men tieý rásimderiniń sozylýyna ákeledi. Osylaisha, buryn ornyqqan búkil logistikalyq bailanys buzylǵan. Bul logistikanyń jáne Qazaqstanǵa qant pen shikizatty jetkizý merziminiń uzarýyna ákep soqty. Qalyptasqan jaǵdai qant baǵasynyń ósýine ákeldi. Osylaisha, qant shikizaty qunynyń, kólik shyǵyndarynyń, sondai-aq óńdeý shyǵyndarynyń qymbattaýy baiqalady», - dedi ministr.
Eske salsaq, Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
