Brakonerlerdiń qolynan zardap shekken «Ohotzooprom «ÓB» RMQK Ortalyq óńirlik filialynyń inspektory Samat Ospanov aýrýhanadan saýyǵyp shyqty, dep habarlaidy QazAqparat tilshisi.
«Naýqastyń jaǵdaiy qanaǵattanarlyq. Jarasy jazyldy. Soljaq qoly men iyǵyn tolyq qozǵalta alady. Odan ári stantsionarlyq kómekti qajet etpeidi. Tek turǵylyqty mekenjaiy boiynsha emhanadaǵy hirýrgke kórinip turady», - dedi tilshi saýalyna jaýap bergen Aqmola oblystyq kópbeiindi aýrýhanasy bas dárigeriniń orynbasary Dmitrii Chaikov.
Naýqas pen onyń áieli oblystyq kópbeiindi aýrýhana, Jarqaiyń aýdandyq aýrýhanasynyń, sondai-aq, sanaviatsiia qyzmetiniń dárigerleri men mamandaryna alǵystaryn bildirdi.
Aita keteiik, osyǵan deiin habarlaǵanymyzdai, 23-shi shildede shamamen saǵat 11.00-de «Ohotzooprom «ÓB» RMQK Ortalyq óńirlik filialynyń inspektorlary Aqmola oblysy Jarqaiyń aýdanynda tabiǵatty qorǵaý zańnamasyn buzǵandarǵa qarsy kiik atý faktisin anyqtaidy. Zań buzýshylardyń izine túsken eki inspektorǵa qarsy oq atylyp, sonyń saldarynan 1976 jylǵy inspektor kóz jumdy, al, onyń 1975 jylǵy áriptesi jaralanyp, Jarqaiyń aýdandyq aýrhanaǵa jatqyzylǵan edi.
Qaitys bolǵan qoryqshynyń artynda tórt balasy – úsh qyzy men bir uly qaldy. QR Prezidenti Qasym-Jomart Toqaev brakonerlerdiń qolynan qaza bolǵan «Ohotzooprom «ÓB» RMQK Ortalyq óńirlik filialynyń inspektory Qanysh Nurtazinovtyń otbasyna kóńil aitty.
Osy qylmysqa bailanysty arnaiy jedel-tergeý toby qurylyp, kúdiktilerdi ustaý boiynsha keshendi sharalar qolǵa alyndy. Kúdiktilerdi ustaýǵa Jarqaiyń, Esil jáne Jaqsy aýdandarynyń politsiia bóliminiń jeke quramy tartyldy. Patrýldik qyzmet nariadynan kúdiktilerdiń kóligine tuspaldaý berildi. Jarqaiyń jáne kórshi aýdandardyń aýmaǵynda 10 blok beket qoiylǵan bolatyn.
Artynsha, bul isti QR Ishki ister ministri men Aqmola oblystyq PD basshysy óz baqylaýyna aldy. Sonymen qatar, atalǵan oqiǵaǵa bailanysty QR QK 99 babynyń 1 bóligi boiynsha qylmystyq is qozǵalǵan bolatyn. Jedel izdestirý sharasy barysynda kúdiktiler Arqalyq qalasynyń 45 jastaǵy turǵyny men onyń 20 jastaǵy balasy ustaldy.
Keiin osy oqiǵadan qaza tapqan «Ohotzooprom» ÓB» RMQK inspektory Qanysh Serikuly Nurtazinovqa QR Prezidenti Qasym-Jomart Toqaev taǵaiyndaǵan memlekettik nagrada - qyzmet babynda eren erligi men janqiiarlyǵy úshin I dárejeli «Aibyn» ordeni, al, onyń áriptesi Samat Ospanovqa II dárejeli «Aibyn» ordeni tapsyryldy.
