QR Ekologiia, geologiia jáne tabiǵi resýrstar ministri Maǵzum Myrzaǵaliev brakonerler jaralaǵan «Ohotzooprom «ÓB» RMQK Ortalyq óńirlik filialynyń inspektory Samat Ospanovty II dárejeli «Aibyn» ordenimen marapattady, dep habarlaidy QazAqparat.
Ministr astanadan Kókshetaýǵa arnaiy kelip, Aqmola oblystyq kópbeiindi aýrhanasynda emdelip jatqan qoryqshymen kezdesip, hal-jaǵdaiyn surap bildi. Qoryqshynyń qyzmet babyndaǵy eren erligi men janqiiarlyǵyn aita kele, QR Prezidenti Qasym-Jomart Toqaev taǵaiyndaǵan memlekettik nagrada - II dárejeli «Aibyn» ordenin tabys etti.
«Memleket basshysynyń tapsyrmasymen búgin Kókshetaýǵa arnaiy kelip, Samat áriptesimizge ystyq sálemin jetkizip otyrmyn. Búgingi kúni qoryqshylardyń jumysy óte aýyr. Buǵan sońǵy kezdegi oqiǵalar aiqyn dálel. Sondyqtan, aldaǵy ýaqytta qoldanystaǵy zańnamaǵa ózgerister engizýdi josparlap otyrmyz. Brakonerlermen kúresýde zańnyń qatal bolǵany mańyzdy», - dep atap ótti ministr.
Aýrýhananyń bas dárigeriniń orynbasary Dmitrii Chaikovtyń aitýynsha, qoryqshy «keýdesine tigen oqtan jaraqat» jáne «sol jaq iyǵynyń jaralanýy» diagnozdarymen kelip túsken.
«Naýqasqa ota jasalyp, denesindegi bóten zat alyndy. Der kezinde jetkizilip, jedel ota jasalǵandyqtan onyń jaǵdaiy jaqsy. Qazirgi kezde naýqas neirohirýrgiia bólimshesiniń palatasyna aýystyrylyp, sonda odan ári em qabyldaýda», - dedi Dmitrii Chaikov.
Aita keteiik, osyǵan deiin habarlaǵanymyzdai, 23 shildede shamamen saǵat 11.00-de «Ohotzooprom «ÓB» RMQK Ortalyq óńirlik filialynyń inspektorlary Aqmola oblysy Jarqaiyń aýdanynda tabiǵatty qorǵaý zańnamasyn buzǵandarǵa qarsy kiik atý faktisin anyqtaidy. Zań buzýshylardyń izine túsken eki inspektorǵa qarsy oq atylyp, sonyń saldarynan 1976 jylǵy inspektor kóz jumdy, al, onyń 1975 jylǵy áriptesi jaralanyp, Jarqaiyń aýdandyq aýrhanaǵa jatqyzylǵan edi.
Qaitys bolǵan qoryqshynyń artynda tórt balasy – úsh qyzy men bir uly qaldy.
Sonymen qatar, atalǵan oqiǵaǵa bailanysty QR QK 99 babynyń 1 bóligi boiynsha qylmystyq is qozǵalǵan bolatyn. Jedel izdestirý sharasy barysynda kúdiktiler Arqalyq qalasynyń 45 jastaǵy turǵyny men onyń 20 jastaǵy balasy ustaldy.
Búgin Qaraǵandy oblysy Ulytaý aýdanynyń Qoskól aýylynda osy oqiǵadan qaza tapqan «Ohotzooprom» ÓB» RMQK inspektory Qanysh Serikuly Nurtazinovty aqtyq saparǵa shyǵaryp salý rásimi ótti. Onyń da otbasyna QR Prezidenti Qasym-Jomart Toqaev taǵaiyndaǵan memlekettik nagrada - qyzmet babynda eren erligi men janqiiarlyǵy úshin I dárejeli Aibyn ordeni tapsyryldy.
