Batys Qazaqstan oblysynda UQK-niń Sybailas jemqorlyqqa qarsy qyzmeti aýqymdy arnaiy operatsiia júrgizip, jeti birdei meditsinalyq mekeme basshysyn ustady, dep habarlaidy ult.kz NayzaMedia basylymyna silteme jasap.
Basylym málimetinshe, ustaý operatsiiasy 14 mamyrda bolǵan.
Ustalǵandardyń qatarynda:
— Batys Qazaqstan oblystyq balalar aýrýhanasynyń bas dárigeri;
— Jánibek, Qaratóbe jáne Terekti aýdandyq aýrýhanalarynyń bas dárigerleri;
— Báiterek aýdanyna qarasty Dariian aýdandyq aýrýhanasynyń bas dárigeri;
— Oral qalasyndaǵy №1 jáne №6 emhanalardyń direktorlary bar.
Qoǵam belsendisi Málik Jumaǵalievtiń aitýynsha, kúdiktiler Qazaqstandaǵy iri jekemenshik meditsinalyq zerthanalardyń birine jáne ózge de jetkizýshilerge qamqorlyq kórsetkeni úshin júieli túrde para alyp otyrǵan degen kúdikke ilingen.
Aldyn ala málimet boiynsha, ustalǵandar kinálaryn moiyndaǵan. Tergeý organdary birneshe ret para alý faktileri boiynsha dálelder bar ekenin málimdegen.
Sot kúdiktilerge elden shyqpaý týraly qolhat jáne úiqamaq túrindegi bultartpaý sharalaryn tańdady.
Aldyn ala aqparatqa sáikes, tergeý zerthanalyq jelilerdiń biriniń qyzmetine qatysty bolýy múmkin. Derekkózderdiń aitýynsha, kompaniia tarapynan meditsinalyq mekeme basshylaryna qarjylai tólemder jasalǵan bolýy yqtimal.
Alaida boljamdy shemanyń naqty qalai jumys istegeni ázirge resmi túrde jariialanǵan joq.
