QR Ekologiia, geologiia jáne tabiǵi resýrstar ministri Maǵzum Myrzaǵaliev Bozjyrada ekologiialyq týrizmdi damytý máselesi talqylanǵan kezdesý qorytyndysy týraly málim etti, dep habarlaidy "Ult aqparat".
«Memleket basshysynyń Bozjyra shatqalynda qonaq úi salý jobasyn qaita qaraý týraly tapsyrmasyna sáikes, Aqtaý qalasynda ǵalymdarmen, biologtarmen, sheteldik sarapshylarmen, jergilikti ekobelsendilermen jáne qoǵam qairatkerlerimen kezdesý ótkizdik. Barlyǵy týristik nysan turǵyzý óńir úshin asa mańyzdy degen ortaq oi aitty», - dep jazdy ol Twitter paraqshasynda.
«Biraq týrizmdi damytý men Bozjyra siiaqty biregei tabiǵi nysannyń ekojúiesin saqtaýdyń arasynda tepe-teńdik bolýy kerek. Jobanyń áleýetin baǵalap, keńesterin berý úshin tájiribeli sarapshylar men ǵalymdardy Bozjyraǵa alyp bardyq», - dedi ministr.
Onyń sózinshe, jergilikti qoǵam belsendileri ǵalymdarmen birge qonaq úi salý óńirdiń týrizmin damytyp, jańa jumys oryndaryn ashý úshin kerek degen oidy alǵa tartqan.
«Sondyqtan turǵyndar men ǵalymdardyń, qoǵam ókilderiniń usynysymen qonaq úi orny Jabaiushqan qaýmalynyń syrtyna aýystyrylady. Investor kompaniia ókilderi óz tarapynan jobany júzege asyratyn oryndy qaýmaldan tys jerden tańdaýǵa daiyn ekenderin jetkizdi», - dep jazdy Maǵzum Myrzaǵaliev.
