Almaty oblysynyń ákimi Qanat Bozymbaev Uiǵyr aýdanynyń halqymen kezdesip, turǵyndardyń saýalyna jaýap berip, atqarylyp jatqan jumystar jóninde baiandady, - dep habarlaidy QazAqparat tilshisi Almaty oblysy ákiminiń baspasóz qyzmetine silteme jasap.
«Uiǵyr aýdanynyń ataýyn aýystyrý týraly saýalǵa bergen jaýabynda Almaty oblysynyń ákimi ótken jyldyń jeltoqsan aiynda bolǵan turǵyndarmen kezdesýinde aqsaqaldar osy máseleni kótergenin, aýdannyń tól tarihi ataýyn anyqtaý úshin ǵalymdardyń da bul iske qosylýyn suraǵanyn aitty. Soǵan bailanysty Til jáne Shoqan Ýálihanov atyndaǵy tarih jáne etnologiia institýttary jasaǵan saraptama tiisti memlekettik organǵa usynylǵanyn jetkizdi. Ázirshe naqty bir saiasi sheshim jasalǵan joq. Degenmen qazir aldyn ala jumystar júrgizilip jatyr», - delingen atalǵan vedomstvonyń baspasóz qyzmeti taratqan aqparatta.
Almaty oblysynyń ákimi Qanat Bozymbaevpen kezdesý barysynda jergilikti pedagogter 550 oryndyq mektepte 600-den astam bala oqyp jatqanyn, oǵan qosa ǵimaratta óner mektebin ashý josparlanyp otyrǵanyn jetkizdi. Olar bul oqý protsesine kedergi keltiredi dep esepteidi.
Oblystyq bilim basqarmasy basshysynyń mindetin atqarýshy Jańyl Súleimenovanyń aitýynsha, balalarǵa qosymsha bilim kerek, úiirmeler qyzmetin uiymdastyrý áli de qarastyrylyp jatyr. Atap aitqanda, osy mekteptiń bazasynda mektepke deiingi shaǵyn ortalyq jumys istegen, oblysta qosymsha bilim berý deńgeiiniń tómen ekenin eskerip, osy baǵytty damytýdyń túrli joldary qarastyrylyp jatyr.
Turǵyndar memlekettik turǵyn úi qorynan úi alý máselesin de ózekti deidi. Bul taraptan halyqty aýdan basshylyǵynyń jumysy qanaǵattandyrmaidy.
Qanat Bozymbaev kóptiń pikirimen kelisetinin aityp, óz baiandamasy barysynda aýdan ákimine osy máselege basar nazar aýdarýdy tapsyrdy.
Atap ótsek, aýdanda turǵyn úi kezeginde 1160 adam tur. Ótken jyly aýdanda 8,5 myń sharshy metr turǵyn úi salynyp, paidalanýǵa berildi. Biyl 14 myń sharshy metr turǵyn úi salý josparlanǵan. Shonjy aýylynda jyl sońyna deiin 60 páterli turǵyn úi paidalanýǵa beriledi. Taǵy bir kredittik turǵyn úi salýǵa 1 mlrd. teńge bólinip, konkýrstyq rásimder bastaldy.
Aýdan ákiminiń aitýynsha, kelesi jyly turǵyn úiler úshin 20 jer ýchaskesi bólinedi. Sonymen qatar 60 páterli úidiń qurylysy bastalady. Bul jumystardyń jetkiliksiz ekenin aitqan oblys basshysy 60 páterli úidiń keminde ekeýiniń qurylysyn josparlaýdy tapsyrdy.
Shonjy aýylynyń turǵyndary birneshe úidiń janynan joǵary voltty elektr jelileri tartylǵanyna alańdaidy. Bul adam densaýlyǵyna ziianyn tigizýi múmkin deidi olar. Qanat Bozymbaev komissiia quryp, tiisti tekserý júrgizýdi, sonyń qorytyndysy boiynsha túbegeili sheshim qabyldaýdy mindettedi.
Ózge de saýaldar Bahar aýylynyń aýmaǵyndaǵy Jarkent-Shonjy respýblikalyq trassasynda jaiaý júrginshi joly men jol belgisin ornatý, Shonjy aýylynda erekshe qajettiligi bar balalar úshin ońaltý ortalyǵyn ashý, ortalyq aýdandyq aýrýhanany kúrdeli jóndeý, aýǵandyq ardagerlerdi jumyspen qamtýǵa jáne úilerine jeńildikpen gaz qostyrýǵa yqpal etýge qatysty aityldy.
