Qazaqstannyń iri munai óńdeý zaýytynda kúrdeli jóndeý jumystary 3 jylda bir ret ótkiziletin bolady. Bul týraly búgin Búkilálemdik munai keńesi otyrysynda elimizdiń Energetika ministri Qanat Bozymbaev aitty, dep habarlaidy QazAqparat tilshisi.
«Eldi otandyq munai ónimderimen tolyqtai qamtamasyz etýge jáne importqa táýeldilikti tómendetýge umtyla otyryp, biz Atyraý, Shymkent jáne Pavlodar munai óńdeý zaýyttaryn jańǵyrttyq. Jańǵyrtý nátijesinde jergilikti naryqty otandyq janarmaimen 100 paiyz qamtamasyz etý múmkinshiligine qol jetkizdik. Zaýyttarymyz K-4 jáne K-5 ekologiialyq standarttaryna sai keletin janar-jaǵarmai materialdaryn óndiretin bolady. Endi megapolister men óńirlerdiń ekologiiasyna júkteme azaiady», - dedi Qanat Bozymbaev.
Onyń aitýynsha, munai óndirý men munai ónimderi óndirisi ósiminiń arqasynda elimizdiń ishki naryǵynda janar-jaǵarmaidyń artylyp qalý jaǵdaiy alǵash ret bolyp otyr. Aldaǵy ýaqytta kórshi eldermen qajetti kelisimsharttar jasalǵannan keiin artyq benzin eksportqa shyǵarylatyn bolady.
«Taiaý ýaqytta tsifrlandyrý aiasynda Atyraý men Shymkent munai óndirý zaýyttarynda tehnikalyq qyzmet kórsetý jáne jabdyqtardy jóndeý jónindegi joba engiziletin bolady. Bul júie profilaktikalyq qaraý jáne jóndeý jumystaryn basqarýǵa, sonymen qatar MÓZ-derdi paidalanýdyń keminde 3 jyldyq jóndeýaralyq kezeńine kóshýge múmkindik beredi», - dedi ol.
Ministrdiń atap ótýinshe, atalǵan jobanyń arqasynda jabdyqtardyń senimdiligi 8-10 paiyzǵa artyp, jóndeý jumystaryna ketetin shyǵyndar 10 paiyzǵa tómendeidi. Buǵan qosa, kúrdeli jóndeý jumystaryna toqtatylýdyń bolmaýyna bailanysty ortasha eseppen jylyna qosymsha 300 myń tonna munai óńdeletin bolady.
