Energetika ministri Qanat Bozymbaev jańa jol kartasyn ázirleýdi tapsyrdy, dep habarlaidy QazAqparat.
«Nur-Sultandaǵy birinshi jáne ekinshi iske qosý kesheniniń qurylysy toqtap qaldy. Jol kartasynda qurylystyń sáýir aiynda bastalyp, osy jyldyń jeltoqsanynda aiaqtalatyny josparlanǵan. Biraq, sizder birde-bir nysan boiynsha jumysty bastaǵan joqsyzdar. Biz respýblikalyq biýdjetten sizderge 2,7 mlrd teńge bólip, jergilikti biýdjetke aýdardyq. Bul qarajattyń bir tiyny da igerilmei jatyr», - dedi Qanat Bozymbaevministrliktiń alqa otyrysynda qala ákiminiń orynbasary Ermek Qizatovqa qarata.
Ministr sonymen qatar, JEO-1 men JEO-2 de áli kúnge deiin jańǵyrtý jumystaryna daiyn emes ekenin atap ótti. Osyǵan bailanysty Energetika ministrligi 2,7 mlrd teńgeni keri qaitarý máselesin kóterip otyr.
«Qazandyqtar tehnologiialyq turǵyda gazben jumys istep ketýge beiim. Osy jumysty josparlaǵan kezde munyń bárin bildik. Osyǵan bailanysty, Gaz jáne munai-gaz himiiasy departamentine qarajatty qaitarý jumysyn qarastyrýdy tapsyramyn. Gazdandyrý boiynsha kerek deseńiz óńirler kezekte tur. Qarajatty daiyndyǵy joǵary sol óńirlerge bólip bergen jón bolar edi», - dedi Qanat Bozymbaev.
Qanat Bozymbaev osyǵan bailanysty Nur-Sultan qalasynyń ákimdigine «Saryarqa» gaz qubyry boiynsha naqty merzimi bekitilgen jańa jol kartasyn ázirleýdi tapsyrdy.
