Búgin Energetika ministri Qanat Bozymbaev janar-jaǵarmai materialdary baǵasyn belgileý boiynsha jiyn ótkizdi. Ol Resei Federatsiiasynyń shekara naryǵynda dizeldi otyn men benzindi tutyný kólemi kúrt artqanyna alańdaitynyn jetkizdi.
«Otandyq munai óńdeý zaýyttaryn jańǵyrtýdyń arqasynda búginde ishki tutyný tolyqtai qamtyldy. Búgin elimizde munai bazasyndaǵy qor úlken, 352 myń tonnany quraidy. Jyl basymen salystyrǵanda munai baǵasy ósse de bólshek baǵada benzinniń litri 160-155 teńge deiin tómendedi», - dedi ministr.
Ol dizel otynynyń naryqtaǵy baǵasy týraly da aita ketti.
«Ekinshi jarty jyldyqta dizel otyny baǵasynyń ósýin baiqap otyrmyz. Bul obektivti, sýbektivti sebepterge bailanysty: dizel otynyn tutyný maýsymy, jyl saiyn bolatyn aýyl sharýashylyǵy óndirýshileriniń jinaý jumystary. Dizeldi otynǵa tranzitti avtokólikter suranysy artyp otyr, elimizdegi janarmai quiý beketterinde basqa eldermen salystyrǵanda baǵa tómen. Mysaly, Resei Federatsiiasymen salystyrǵanda janarmai quiý beketterindegi baǵa alshaqtyǵy 55-60 tg/l turady. Jańa jyldan keiin bul alshaqtyq artady degen qaýip bar», - dedi Bozymaev.
Ministrlik qarasha aiynda dizel otynynyń baǵasy tómendeidi dep kútilgenin atap ótti. 1 qarashada dizeldiń aktsiz mólsherlemesi 549 myń 300 teńgeden 540 myń teńgege deiin tómendegen.
«Resei Federatsiiasynyń shekara naryǵynda dizeldi otyn men benzindi tutyný kólemi kúrt artty. Búginde 3 mln halyq ómir súretin Túrkistan oblysy men Shymkent qalasyn 700-800 myń adam ómir súretin BQO men Qostanai oblystarymen salystyratyn bolsaq, sońǵy eki oblys ońtústikpen salystyrǵanda dizel otyny men benzindi áldeqaida kóp tutynady. Iaǵni, shetelge ketedi degen sóz. Resei Federatsiiasyna aýyr júk mashinalarymen jetkiziledi. Olar ózderine qosymsha bak qondyryp alady. Mundai faktiler bar. Shekaramyzdyń keń ekeni túsinikti. Premer-ministrge osy faktilerdi baiandadym. Eger Reseide baǵa ósetin bolsa, ol jaqqa elimizden bári jetkizilýi múmkin. Sol sebepti bul máseleni shekaramyzda qadaǵalaýymyz kerek. Premer-ministr óziniń orynbasary Dosaevqa tapsyrma berdi. Áriptester, sizdermen birge naryǵymyzdy qorǵaý týraly usynystardy talqylap, olardy juma kúni Úkimetke baiandaimyz. Budan basqa jol joq», - dedi Energetika minitsri.
Ol bul máseleni baǵany Reseidikindei kóterý arqyly sheshý joly baryn, biraq bul múmkin emes ekenin aitty. Iaǵni dizel otynyn 250 tg, benzindi 240 teńgege deiin kóterý – bos qiial.
«Birinshi nusqa boiynsha jumys isteitin bolamyz. Sol kezde janarmaidy óz shekaramyzda tutynatyn bolamyz. Dizel otynynyń baǵasyn tómendetý aýqymdy jelilerdiń ǵana emes, sondai-aq janarmai quiý beketteriniń qojaiyndaryna da qatysty. 1 qarashada dizel otyny aktsizi tómendedi. Sol sebepti barlyq janarmai quiý beketteri dizel otynyna adekvatty baǵa qoiý sharalaryn qabyldaý qajet. Kóterme saýda kompaniialary da baǵany tómendetýi tiis. Biz baǵany naryq retteitinin túsinemiz. Dizel otynynyń baǵasy memleket tarapynan rettelmeidi. Sizderdiń isterińizge biz kirise alamyz, qandai da bir ótinish jasai alamyz. Sebebi eger biz kómektespesek aldaǵy ýaqytta shekarada sizderde problema bolýy múmkin», - dep eskertti Bozymbaev munai ónimderin óndiretin jáne satatyn kompaniia ielerine.
