QR Energetika ministri Qanat Bozymbaev qazaqstandyq benzindi syrtqa shyǵarýdy shekteý úshin qabyldanatyn sharalar týraly aityp berdi, dep habarlaidy "Ult aqparat".
«Búginde Ádilet ministrligi Energetika ministrligimen, Ulttyq qaýipsizdik komitetimen, sondai-aq Qarjy ministrligimen birlesken buiyryqty tirkeýden ótkizdi. Onda ashyq tústi munai ónimderin jáne ózge munai ónimderi túrlerin Qazaqstan aýmaǵynan avtomobil kóligimen shyǵarýǵa shekteý sharalary qamtylǵan. Endi benzindi, dizel otynyn jáne munai ónimderiniń basqa da túrlerin avtotsisternalarmen Qazaqstannan tys shyǵarýǵa tyiym salynady», - dedi Qanat Bozymbaev Úkimet otyrysynan keiin tilshiler saýalyna jaýap bere otyryp.
Onyń sózine qaraǵanda, shekteý sharalary tranzittik avtobýstarǵa da qatysty bolady.
«Sonymen qatar, otyn quiatyn qosymsha baktar qoiylǵan júk kólikteri de tiisti jaýapkershilikke tartylady, iaǵni atalǵan shekteýmen qamtylady. Sebebi kóptegen júk kólikteri jáne tranzitti avtobýstar otyndy shetke shyǵarý úshin jańa qosymsha baktar ornatady. Sondyqtan endi tiisti shekteý sharalary iske asyrylmaq», - dedi ministr.
Jeńil kólikter úshin janarmai quiýǵa shekteý bolmaidy. Alaida Qazaqstannan tys shyǵarylatyn kanistrler baqylaýda bolady.
«Jeke avtokólik janar-jaǵarmai quiý stansasyna kelip, emin-erkin jiyrma litrlik bir kanistrge benzin toltyra alady. Al eger kóliktiń júk salǵyshynda odan kóp kanistrlerge otyn toltyratyn bolsa, oǵan shekteý engiziledi. Sondyqtan biyl benzin men dizel otyny baǵasynyń ózgerýi úshin eshqandai negiz joq», - dedi Bozymbaev.
