Ulttyq testileý ortalyǵynyń basshysy Ramazan Álimqulov UBT-daǵy qyzyqty oqiǵalar týraly baiandady, dep habarlaidy "Ult aqparat".
Onyń aitýynsha, UBT bilimdi ǵana teksermeidi, ǵashyqtardy da tabystyrady.
«Bizge jaqynda Merei esimdi astanalyq túlek habarlasty. Ol qańtar aiynda «Mega» saýda ortalyǵynda Astanaǵa qonaqqa kelgen Arai esimdi shymkenttik arýmen tanysqan. Biraq, onyń bailanys nómirin alyp úlgermegen jáne Araidyń biyl UBT tapsyratynyn bilip, UBT-nyń onlain transliatsiiasy arqyly ony tapty. Súiiktisi synaq tapsyrǵan pýntti anyqtaǵan boida, Merei bizge habarlasyp, onyń bailanys nómirin tabýda kómek surady. Kórdińizder me, UBT bilimdi ǵana teksermeidi, ǵashyqtardy da qosady», - dedi Ramazan Álimqulov Ortalyq kommýnikatsiialar qyzmetinde ótken baspasóz máslihatynda.
Ortalyq basshysy astanalyq bozbalanyń tilegin jerge qaldyrmai, Araidy izdep jatqandaryn habarlady.
«Bizde qai aýditoriiada kimderdiń test tapsyrǵany týraly aqparat bar. TJK, JSN nómirleri qolymyzda. Atalǵan bólimshede Arai esimdi qansha qyzdyń bolǵanyn anyqtaimyz jáne aty-jóni men bailanys nómirin kelisim boiynsha astanalyq jigitke bere alamyz. Bul boiynsha jumys istep jatyrmyz. Jastarǵa sáttilik tileimiz», - dedi ol.
Aita keteiik, UBT-nyń alǵashqy úsh kúninde Qazaqstandaǵy ortasha ball 83-ti qurady. Eń joǵary nátije Almaty qalasynda T. Rysqulov atyndaǵy ulttyq ekonomikalyq ýniversitette tirkeldi. Onda almatylyq Hamzin Dáýlet Azatuly 139 ball jinady.
Respýblika boiynsha 704 mektep bitirýshi 130-139 ball aralyǵynda nátije kórsetken.
Respýblika boiynsha 704 mektep bitirýshi 130-139 ball aralyǵynda nátije kórsetken.
Biyl respýblika boiynsha mektep bitirýshilerdiń 70%, iaǵni 102 myńy UBT tapsyrady. Mektep bitirgen 147 myń túlektiń basym bóligi UBT-ny qazaq tilinde tapsyrady.
UBT-da jalpy 80 myń suraq bolady. 2018 jylǵa arnalǵan Ulttyq biryńǵai test suraqtary 50 paiyzǵa jańartylǵan.
Qazaqstandyq mektep bitirýshilerge Ulttyq biryńǵai testileýden ótýge eki ret múmkindik beriledi. Ekeýinde de qajetti ball jinai almaǵan balalar JOO-ǵa shartty túrde qabyldanady.
