Ǵylymi konferentsiiadan qaityp kele jatqan boijetkendi «Talgo» poiyzynda zorlady degen kúdik boiynsha eki jolserikke qatysty qylmystyq is sotqa tústi, dep habarlaidy QazAqparat.
Oqiǵa ótken jyldyń kúzinde bolǵan. Bul týraly «NeMolchiKZ» qoǵamdyq qorynyń basshysy Dina Smailova Facebook paraqshasynda jazdy.
«26 qyrkúiek kúni keshki saǵat 10-dar shamasynda boijetken «Talgo» poiyzynyń kýpesine otyrady. Kýpe ishinde otyrǵan er adamdy kóredi. Zattaryn qoiyp, poiyz meiramhanasynyń ashanasynan tamaqtanyp keledi. Kýpege oralǵanda kýpe ishinde arnaiy forma kimegen jolserik otyrady. Ol áýelgi kirgen er adamdy basqa kýpege aýystyryp jibergenin aitady. Qyz uiqysy kelgenin túsindirip, jolserikten kýpeden shyǵýyn ótinedi. Syra iship otyrǵan jolserik tek jarty saǵattan soń shyǵyp ketken. Alaida tańǵy saǵat 04:00 shamasynda jolserik boijetken jatqan kýpege óz kilti arqyly ashyp kiredi. Munan soń jolserik jymysqy is-áreketin júzege asyrady. Izinshe ekinshi jolserik te kelip, boijetkendi zorlaǵan», – dep jazdy Dina Smailova.
Osy oqiǵadan keiin boijetken kúizeliske túsken. Qylmystyq is túrli saraptamalardyń qorytyndysy boiynsha dáleldengen. Boijetken psihologtyń qabyldaýyna turaqty baryp turady.
Al burynǵy jolserikter Qolqanat Qulmaniiazov pen Jetes Úmbetálievke qatysty sot otyrysy 26 shildege shegerildi.
