Qazaqstandyqtar tanymal kásipker ári jýrnalist Beibit Álibekov túsken jarnamaǵa narazylyq bildirdi, dep jazady Sputnik agenttigi.
Rolik siýjeti boiynsha jýrnalist boijetkendi júksalǵyshqa jatqyzyp, avtomobildiń dybys oqshaýlaǵyshyn teksergen.
Ózin táýelsiz BAQ retinde tanystyratyn Batyr Jamal redaktsiiasy osy jarnamaǵa nazar aýdardy.
Videoda Álibekov tanymal mashinanyń dybys oqshaýlaǵyshy teńdessiz ekenin aitady da, jan daýysy shyǵa aiqailaǵan qyz jatqan júksalǵyshtyń esigin jabady.
Jeli qoldanýshylary video astyna pikir qaldyryp, bul zorlyqpen qyz alyp qashý qylmysyna qoldaý kórsetý ekenin eskertken. Keibireýler bul ádeii haip úshin túsirilgen video ekenin aitty.
Al Beibit Álibekovtyń ózi jarnamada qandai da bir teris áreketti qoldaýǵa degen niet bolmaǵanyn málimdedi. Ol video avtorlary "TikTok jelisindegi amerikalyq tanymal videony qaitalamaq bolǵandaryn" aitty.
"Osy video kóńiline tigen adamdardan keshirim suraimyn jáne "qyz alyp qashýǵa" qatysy bar dep tanylǵan osy kontekstke qatysty jaýapkershilikti sezine otyryp, videorolikti óz paraqshamnan óshirýdi jón kórdim", - dep jazdy Álibekov.
Buǵan deiin Qyrǵyzstanda bolǵan qaiǵyly oqiǵa qazaqstandyqtardy bei-jai qaldyrmaǵan edi. Bishkekte 27 jastaǵy Aizada Qanatbekovany urlap ketken azamat ony býyndyryp óltirgeni belgili boldy. Qylmysker sodan keiin óz-ózine qol jumsaǵan. Osy jaǵdaidan keiin Qyrǵyzstan jurty ishki ister ministriniń otstavkaǵa ketýin talap etip mitingige shyqty.
