Bostandyq aýdanynda Almaty qalasynyń dizain-kod talaptaryna sáikes biryńǵai sáýlettik kelbetti qalyptastyrýǵa baǵyttalǵan qalalyq baǵdarlama aiasynda kópqabatty turǵyn úilerdiń qasbetterin jóndeý jumystary jalǵasýda. Óńirlik kommýnikatsiialar qyzmeti uiymdastyrǵan baspasóz týrynda jobanyń júzege asyrylý barysymen jýrnalisterdi Bostandyq aýdany ákiminiń orynbasary Miras Zeinoldin tanystyrdy, dep habarlaidy ult.kz.
Baǵdarlama aiasynda biyl aýdan boiynsha 67 kópqabatty turǵyn úidiń qasbetin jóndeý josparlanǵan. Jobanyń negizgi maqsaty – turǵyn úi qorynyń syrtqy kelbetin keshendi túrde jańartý, kóshelerdiń biryńǵai sáýlettik kelbetin qalyptastyrý, qalalyq ortanyń estetikalyq tartymdylyǵyn arttyrý jáne turǵyndardyń ómir súrý jaǵdaiyn jaqsartý.
«Almatyda qasbetterdi jańartý jumystary biylǵy sáýir aiynan beri júrgizilip jatyr. Alǵashqy kezeńde Abai dańǵyly, Sátbaev, Timiriazev kósheleri jáne basqa da magistraldyq kósheler boiynda ornalasqan úiler irikteldi. Árbir ǵimarat úshin onyń tarihi kelbetin saqtai otyryp, jeke dizain-joba ázirlenýde», – dedi Miras Zeinoldin.
Jóndeý barysynda qalanyń bekitilgen sáýlettik talaptaryna sai keletin zamanaýi ári uzaq merzimge tózimdi materialdar qoldanylady.Árleý jumystaryna uzaq ýaqyt boiy sapasyn saqtaityn, berik ári tózimdi travertin, granit jáne aliýminii kompozittik panelder paidalanylady.
Qazirgi tańda 47 kópqabatty turǵyn úide qurylys-montaj jumystary júrgizilip jatyr, onyń ishinde tórt úidiń qasbeti tolyq jańartyldy. Qasbetterdi jóndeýmen qatar, joba aiasynda ǵimarattarǵa sáýlettik jaryqtandyrý ornatý, balkon oiyqtaryn, sándik elementterdi jáne kireberis toptaryn jańartý jumystary da qarastyrylǵan.
«Baǵdarlama úilerdiń syrtqy kelbetin jańartýmen ǵana shektelmei, olardyń paidalaný merzimin uzartýǵa da baǵyttalǵan. Alǵashqy nysandar paidalanýǵa berilgennen keiin turǵyndar nátijeni oń baǵalap, búginde kóptegen azamattar óz úilerin baǵdarlamanyń kelesi kezeńine engizýdi surap jatyr», – dep atap ótti aýdan ákiminiń orynbasary.
Baǵdarlamany iske asyrý nátijesinde turǵyn úilerdiń syrtqy kelbeti jańartylyp qana qoimai, aýdan turǵyndary úshin jaily, zamanaýi ári estetikalyq tartymdy qalalyq orta qalyptasady.
