Aqtaýda Kaspii teńizinde serýendep júrgen kater jartasqa soǵylyp, eki adam qaza tapty. Taǵy bes adam túrli jaraqatpen aýrýhanaǵa jetkizildi, dep habarlaidy ult.kz.
Mańǵystaý oblystyq tótenshe jaǵdailar departamentiniń málimetinshe, qaiǵyly oqiǵa 30 tamyz kúni keshke 5A shaǵynaýdany mańynda bolǵan. Qutqarý qyzmetine habarlama saǵat 22:56-da túsken.
Kater bortynda jeti adam bolǵan. Qutqarýshylar bes adamdy jaǵaǵa shyǵaryp, meditsina qyzmetkerlerine tapsyrdy. Aldyn ala málimet boiynsha, qaza tapqan eki adam qutqarý keýdeshesin kimegen.
Izdeý-qutqarý jumystary kezinde jaǵadan shamamen 500 metr jerden eki adamnyń denesi tabylyp, sýdan shyǵaryldy.
Oqiǵa ornyna Tótenshe jaǵdailar departamentiniń 35 qyzmetkeri, tórt tehnikasy jáne tórt júzý quraly jumyldyryldy. Sonymen qatar politsiianyń 10 qyzmetkeri men tórt tehnikasy, Apattar meditsinasy ortalyǵynyń mamandary jáne jedel járdemniń bes brigadasy jumys istedi.
Mańǵystaý oblystyq kópbeiindi aýrýhanasynyń málimetinshe, oqiǵadan bes er adam zardap shekken. Tórteýiniń denesiniń birneshe bóliginen túrli jaraqat anyqtalǵan. Úsh naýqas jansaqtaý bólimine jatqyzyldy. 1988, 2002 jáne 1964 jyly týǵan azamattardyń jaǵdaiy aýyr, dárigerler baqylaýynda.
1985 jyly týǵan er adamnyń jaǵdaiy turaqty. Ol travmatologiia bóliminde em qabyldap jatyr. Al 1996 jyly týǵan azamatqa meditsinalyq kómek kórsetilgennen keiin ambýlatorlyq em taǵaiyndalyp, úiine jiberilgen.
Qazir politsiia qaiǵyly oqiǵanyń naqty sebepteri men mán-jaiyn anyqtap jatyr.
