Kambodja biligi 1 455 jolaýshysy men 802 ekipaj múshesi bar krýiz lainerine Kambodja portyna kirýge ruqsat berdi, dep habarlaidy "Ult aqparat".
Keme operatory Holland America Line kompaniiasynyń aqparatyna qaraǵanda, jolaýshylar kemeden jaǵalaýǵa shyǵa alady.
«Qazirgi ýaqytta Westerdam Kambodjanyń Sianýkvil qalashyǵyna bet aldy. Sol jerde saiahat aiaqtalady. Biz jergilikti ýaqyt boiynsha beisenbi, 13 aqpan saǵat 07-00-de jetemiz jáne jolaýshylardy túsirý úshin birneshe kún portta bolamyz. Qonaqtarǵa jaǵalaýǵa shyǵýǵa ruqsat beriledi. Barlyq ruqsat alyndy jáne Kambodja biligine qoldaý bildirgeni úshin alǵysymyz sheksiz», - delingen kompaniianyń Facebook paraqshasynda búgin jariialaǵan habarlamasynda.
Taratylǵan aqparatqa qaraǵanda, aldaǵy birneshe kúnniń ishinde jolaýshylar charterlik reistermen el astanasy Pnompen qalasyna, odan ary úilerine jetetin bolady. Holland America Line kompaniiasy ushýlardy uiymdastyrýǵa ketken barlyq shyǵyndardy óz moinyna alyp, saiahattaýǵa jumsalǵan shyǵystardy da tolyqtai óteitin bolady.
«Borttaǵy qonaqtardyń barlyǵynyń deni saý. Aqparat qate ketken, bortta koronavirýspen aýrý deregi tirkelgen joq jáne esh ýaqytta bolǵan da emes», - dedi kompaniiadan.
