Qaraǵandy oblysy politsiia departamentiniń bastyǵy Erlan Faizýllin Jańaarqa aýdanynda dalada borandy kúni joǵalyp ketken jasóspirimdi izdep tapqan eki politseige nagrada tabys etti, dep habarlaidy "Ult aqparat".
Apparattyq keńes bastalar aldynda Qaraǵandy oblysy PD bastyǵy Erlan Faizýllin ýchaskelik politsiia inspektory Jubanysh Júnisbekov pen Jańaarqa politsiia bóliminiń kezekshi-politseii Qabi Óskenbaevqa II dárejeli «Ishki ister organdarynyń úzdigi» tósbelgisin tabys etti. Politsiia qyzmetkerleri IIM ministri Erlan Turǵymbaevtyń buiryǵymen dalada adasyp ketken jasóspirimdi qutqarǵany úshin marapattaldy.
Sondai-aq Erlan Faizýllin politseilerge 100 myń teńge kóleminde syilyq tabystady.
«Uzaq ýaqyt boiy sharshaǵanyna, sýyqqa qaramastan bizdiń qyzmetkerler joǵalǵan balany izdestirdi. Olardyń ójettiliginiń, ár azamatqa degen qamqorlyǵynyń, tabandylyǵynyń arqasynda jasóspirim qutqaryldy. Olarǵa qurmet jáne madaqtaýǵa laiyq!»- dep atap ótti oblystyq PD bastyǵy.
«Qiyn boldy, biraq biz balany tabý úshin qolymyzdan kelgenniń barlyǵyn jasaýymyz kerek degen oi jibermedi. Qýanyshymyzǵa orai ony taptyq. Bizdiń ornymyzda árbir politsei osylai isteitin edi», - dedi Jubanysh Júnisbekov.
Esterińizge sala keteiik, 16 aqpanda Qaraǵandy oblysy Jańaarqa aýdanynyń politsiia bólimine eki kún buryn qystaqtyń birinen 16 jasar jasóspirim ketip, qaityp oralmaǵany týraly habarlama kelip tústi. Osy aqparatty alǵan politseiler tolyq aýqymdy jedel-izdestirý is-sharalaryn uiymdastyrdy, olarǵa qolda bar barlyq kúsh pen tehnika tartyldy. Sol kúni politseiler Jubanysh Júnisbekov pen Qami Óskenbaev dalada jasóspirimdi taýyp, ony ata-anasyna jetkizdi.
