قاراعاندى وبلىسى پوليتسييا دەپارتامەنتٸنٸڭ باستىعى ەرلان فايزۋللين جاڭاارقا اۋدانىندا دالادا بوراندى كٷنٸ جوعالىپ كەتكەن جاسٶسپٸرٸمدٸ ٸزدەپ تاپقان ەكٸ پوليتسەيگە ناگرادا تابىس ەتتٸ, دەپ حابارلايدى "ۇلت اقپارات".
اپپاراتتىق كەڭەس باستالار الدىندا قاراعاندى وبلىسى پد باستىعى ەرلان فايزۋللين ۋچاسكەلٸك پوليتسييا ينسپەكتورى جۇبانىش جٷنٸسبەكوۆ پەن جاڭاارقا پوليتسييا بٶلٸمٸنٸڭ كەزەكشٸ-پوليتسەيٸ قابي ٶسكەنباەۆقا ٸٸ دەرەجەلٸ «ٸشكٸ ٸستەر ورگاندارىنىڭ ٷزدٸگٸ» تٶسبەلگٸسٸن تابىس ەتتٸ. پوليتسييا قىزمەتكەرلەرٸ ٸٸم مينيسترٸ ەرلان تۇرعىمباەۆتىڭ بۇيرىعىمەن دالادا اداسىپ كەتكەن جاسٶسپٸرٸمدٸ قۇتقارعانى ٷشٸن ماراپاتتالدى.
سونداي-اق ەرلان فايزۋللين پوليتسەيلەرگە 100 مىڭ تەڭگە كٶلەمٸندە سىيلىق تابىستادى.
«ۇزاق ۋاقىت بويى شارشاعانىنا, سۋىققا قاراماستان بٸزدٸڭ قىزمەتكەرلەر جوعالعان بالانى ٸزدەستٸردٸ. ولاردىڭ ٶجەتتٸلٸگٸنٸڭ, ەر ازاماتقا دەگەن قامقورلىعىنىڭ, تاباندىلىعىنىڭ ارقاسىندا جاسٶسپٸرٸم قۇتقارىلدى. ولارعا قۇرمەت جەنە ماداقتاۋعا لايىق!»- دەپ اتاپ ٶتتٸ وبلىستىق پد باستىعى.
«قيىن بولدى, بٸراق بٸز بالانى تابۋ ٷشٸن قولىمىزدان كەلگەننٸڭ بارلىعىن جاساۋىمىز كەرەك دەگەن وي جٸبەرمەدٸ. قۋانىشىمىزعا وراي ونى تاپتىق. بٸزدٸڭ ورنىمىزدا ەربٸر پوليتسەي وسىلاي ٸستەيتٸن ەدٸ», - دەدٸ جۇبانىش جٷنٸسبەكوۆ.
ەستەرٸڭٸزگە سالا كەتەيٸك, 16 اقپاندا قاراعاندى وبلىسى جاڭاارقا اۋدانىنىڭ پوليتسييا بٶلٸمٸنە ەكٸ كٷن بۇرىن قىستاقتىڭ بٸرٸنەن 16 جاسار جاسٶسپٸرٸم كەتٸپ, قايتىپ ورالماعانى تۋرالى حابارلاما كەلٸپ تٷستٸ. وسى اقپاراتتى العان پوليتسەيلەر تولىق اۋقىمدى جەدەل-ٸزدەستٸرۋ ٸس-شارالارىن ۇيىمداستىردى, ولارعا قولدا بار بارلىق كٷش پەن تەحنيكا تارتىلدى. سول كٷنٸ پوليتسەيلەر جۇبانىش جٷنٸسبەكوۆ پەن قامي ٶسكەنباەۆ دالادا جاسٶسپٸرٸمدٸ تاۋىپ, ونى اتا-اناسىنا جەتكٸزدٸ.
