«Bolmaǵan balalyq shaq» – tanymal aqyn, Qazaqstan Jazýshylar odaǵynyń múshesi, QR «Daryn» jastar syilyǵynyń iegeri Aqberen Elgezektiń keiingi jyldary bestsellerge ainalǵan týyndysy «Bolmaǵan balalyq shaq» shyǵarmasynyń jelisi boiynsha túsirilgen dramalyq film.
Bul týyndy teatr sahnasynda da qoiylyp, kórermenniń ystyq yqylasyna bólengen bolatyn. Endi dál osy shyǵarma kino bolyp túsirilip, úlken ekranǵa jol tartpaq. Bas prodiýseri avtordyń ózi – Aqberen Elgezek, rejisseri – Aidyn Sahaman, stsenariiin jazǵan – Efrat Sháripov. Filmdegi basty rólderdi Erlan Bilál, Berik Aitjanov, Áshim Ahmetov pen jas akter Shákárim Almasbek oinady.
Shynaiy oqiǵaǵa negizdelgen bul týyndy balalyq shaǵynan aýyr taǵdyrdyń synaǵyna túsken keiipkerdiń ómirin sýretteidi. Basty keiipker qiyndyqtar men ádiletsizdikke qaramastan, óz jolyn tabýǵa jáne adamdyq qasietterin saqtaýǵa tyrysady.
Filmde «Bolmaǵan balalyq shaq» shyǵarmasyndaǵy oqiǵalarǵa negizdelgen siýjetter kórinis tapqan. Oqiǵanyń shynaiylyǵy men keiipkerlerdiń tereń psihologiialyq beinesi kórermenge úlken áser syilaidy.
Aita ketý kerek, Aqberen Elgezektiń «Bolmaǵan balalyq shaq» shyǵarmasy qazaq ádebietine úlken jańalyq bolyp engen týyndylardyń biri. Búginde kitap naǵyz bestsellerge ainalyp, qalyń oqyrmanǵa 40 000 – nan astam danasy taralǵan. Qazaq ádebietinde kórkem shyǵarmanyń dál osyndai aýqymdy kórsetkishpen taralýy airyqsha qubylys.
Filmdi túsirý basynda, Qazaqfilmniń bazasynda kasting shamamen 3-4 ai ótip, oǵan 700-ge jýyq bala qatysqan. Rejisserdiń aitýynsha, konkýrs birneshe kezeńnen turǵan.
«Ártúrli akterlyq mekemelerden, úiirmeler men mektepterden ailar boiy balalar toqtamai kelip otyrdy. Solardyń arasynan iriktelip alyndy. Konkýrs birneshe kezeńnen turdy. Birinshi fotosýretten bastap, ónerine qatysty, odan keiin sahnada oinaǵan, partnerlyq sahnada oinaǵan irikteýler boldy. Solardyń arasynan tórt aida tapqan basty keiipkerimiz Aqoshty oinaityn eki jas aiyrmashylyǵyndaǵy keiipker bar. Kishkentai jáne úlken... Mekteptiń basy men aiaǵy ǵoi. Ony stýdentterdiń arasynan qaradyq. Sonyń ishinen tapqan basty keiipker kishkentai Aqosh – Shákárim Almasbek, úlken Aqosh – Nurtilek Jarylqasyn», – deidi rejisser Aidyn Sahaman.
Sonymen qatar, balanyń qasyndaǵy dostary, ápke-baýyrlaryn oinaǵan bolashaq kásibi artister T. Júrgenov atyndaǵy Akademiia men J.Elebekov atyndaǵy Estrada jáne tsirk kolledjiniń stýdentteri oinap shyqqan.
«Bolmaǵan balalyq shaq» shyǵarmasy jeke avtordan álemdik Amazon platformasynda jáne AQSh-taǵy tanymal tarihi Barnes & Noble internet-kitap dúkeninde, AppStore, Playmarket platformalarynda satylyp jatqan tuńǵysh kitap. Jýyrda atalǵan týyndynyń aýdionusqasy áigili Audiobooks platformasynda jaryq kórgeli jatyr. Kitaptyń bashqurt tilindegi nusqasy Bashqurtstan Respýblikasynda jyldyń úzdik prozasy retinde tanyldy.
Shyǵarma Qazaqstannyń úsh birdei teatrynda sahnalanyp teatr kórermenderiniń de yqylasyna bólengenin de aita ketken jón. Barlyq teatrlarda shyǵarmanyń ár qoiylymy anshlagpen ótti. Tanymal aqynnyń shynaiy ómirden alynǵan balalyq shaq jaily shyǵarmasy áýeli kórkem ádebietke ainalyp, bestsellerler qatarynan kórinse, keiinnen teatr týyndysy retinde óz kórermenin tapty. Alai da filmniń rejisseri bul teatrydaǵy qoiylymdardy arnaiy kórmegenin tilge tiek etip, kinoda óziniń rejisserlik qoltańbasyn tanytpaq niette ekenin aitty.
«Rejisser retinde óz basym bul spektaklge ádeii barǵan joqpyn. Óitkeni ár rejisserdiń óziniń qoltańbasy men kózqarasy bar. Bir shyǵarmadan ekinshi shyǵarmaǵa bir stilistika, bir ideia kóship ketpeýi úshin ádeii barmadym. Tek qana kitapty oqyp, ózimniń rejisserlik originaldy oiymdy saqtaý úshin solai ettim. Qandai bailanys bar ekenin tek qana kórermen aita alatyn shyǵar», – deidi Aidyn Sahaman.
Al film Almaty oblysynyń shyǵysynan batysyna deiin bes aýylynda túsiriligen. Kegen aýdany Toǵyzbulaqta, odan keiin Jambyl aýdany Besmoinaq degen aýylda túsirdik. Suranshy batyr, Aqseńgir aýyldarynda da túsirilim ótti.
Sonymen qatar shyǵarma qyrǵyz, ózbek tilderine aýdarylýda. Osylaisha shyǵarma kórkem ádebi týyndy retinde keń taralyp, qalyń oqyrmannyń, onyń ishinde orta Aziia kitapsúierleriniń súiikti kitabyna ainaldy. Al búginde tanymal shyǵarma ekranizatsiialanyp, otandyq kino álemine saparyn bastady. Súiikti shyǵarmalaryn teatrdan kórgen kózi qaraqty kórermen «Bolmaǵan balalyq shaqty» endi el kinoteatrlarynan tamashalamaq.
