Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine biýdjet zańnamasyn jetildirý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasy Parlamenttiń, Esep komitetiniń, sondai-aq Ekonomikalyq yntymaqtastyq jáne damý uiymynyń usynystaryn iske asyrýǵa baǵyttalǵan.
Qujat Biýdjet kodeksine tiisti baǵyttar boiynsha túzetýlerdi kózdeidi, iaǵni biýdjettik táýekelder men memlekettik qarjynyń turaqtylyǵy týraly taldamalyq esepti qalyptastyrý eskerilgen.
«Biýdjettik táýekelder men memlekettik qarjynyń turaqtylyǵy týraly esepti jyl saiyn Parlamentke respýblikalyq biýdjettiń jobasymen engizý usynylady. Qujatta memlekettik qarjy jaǵdaiyna áser etetin makroekonomikalyq, demografiialyq, qarjylyq jáne basqa da táýekelderdiń taldaýy qamtylatyn bolady. Osyndai qujatty qalyptastyrý biýdjettik táýekelderdi tiimdi basqarýǵa jáne olardy biýdjettik sheshimder qabyldaý kezinde eskerýge múmkindik beredi», - dedi Ulttyq ekonomika ministri Áset Armanuly Erǵaliev.
Onyń aitýynsha, biýdjetaralyq qatynastardy jetildirý aiasynda jergilikti atqarýshy organdarǵa jergilikti biýdjetten qarjylandyrýdyń eń az kólemde belgilengen jalpy sipattaǵy transfertter qarajatyn basqa shyǵystarǵa qaita bólý múmkindigin berý usynylyp otyr.
«Strategiialyq josparlardy sapaly josparlaý jáne oryndaý maqsatynda, bólingen qarajat tolyq igerilmegen jaǵdaida, jyl sońynda respýblikalyq biýdjetke keri qaitarýyna bailanysty, tórtinshi toqsanda strategiialyq josparlardyń nysanaly indikatorlaryn ózgertýge tyiym salynady», - dep túsindirdi ministr.
Budan bólek, memlekettik qoldaý sharalary aiasynda bólingen qarajattyń paidalanylýyna baqylaý men monitoringti kúsheitý maqsatynda memlekettik baǵdarlamalardy qarjylai jáne qarjylai emes qoldaý operatorlaryna, sondai-aq qaryz alýǵa memleket kepildik bergen kvazimemlekettik sektor sýbektilerine qazynashylyqta shottar ashý kózdelip otyr.
