Aqparat jáne qoǵamdyq damý vitse-ministri Bolat Tilepov vedomstvoda sybailas jemqorlyqqa qarsy saiasatty aqparattyq qoldaý qadamdary týraly aityp berdi, dep habarlaidy QazAqparat.
«Jalpy, sybailas jemqorlyqqa qarsy is-qimyl - ol barlyq memlekettik organdarǵa ortaq mindet. Osy baǵytta bizdiń ministrlikte bul jumystarǵa úlken basymdyq berilgen. Birinshiden, ministrlik jetekshilik etetin salalarda sybailas jemqorlyqqa qarsy standarttardy bekitken bolatynbyz, iaǵni vedomstvoǵa kelgen árbir jańa qyzmetker osy standarttarmen tanysyp, ondaǵy qaǵidattardy oryndaýǵa mindetteledi. Budan bólek, ministrliktiń jáne onyń tiisti qurylymdary jumysyna qatysty jemqorlyqqa qarsy jospar jasalyp, bekitildi. Bul jospar aqparattyq túsindirýden bastap, jalpy quqyqtyq yqpal etý sharalaryn qamtyp otyr», - dedi vitse ministr áleýmettik jelidegi anticorruption.kz paraqshasynda ótken talqylaýda.
Sonymen qatar B. Tilepov ministrliktiń qatysýymen «Adaldyq alańy» jobalyq keńsesi jumysyn jalǵastyryp jatqanyn eske saldy.
«Osy joba aiasynda úlken nátijelerge qol jetkizilip jatyr. Budan bólek, ministrlik jumysyna sybailas jemqorlyqqa qarsy monitoringilerdi keńinen júrgizýdemiz. Aqparat jáne qoǵamdyq damý ministrligi bolǵandyqtan, bul jumystarǵa qoǵam ókilderin, qoǵamdyq uiymdardy keńinen tartýǵa tyrysamyz. Bul turǵyda bizde seriktestik negizdegi jumys jolǵa qoiylǵan», - dedi ol.
«Jalpy, osy saladaǵy nátijelerdiń biri – ministrlik jumysynyń ashyqtyǵy. Ashyqtyq printsipin keńinen qoldanyp kelemiz. Barlyq talqylaý jumystary onlain formatta ótip jatyr. Osy rette, ministrdiń bastamasymen turaqty jumys isteitin «dóńgelek ústel» otyrysy (onlain rejimde) uiymdastyrylyp otyr. Bul talqylaýlarǵa qoǵamdyq belsendiler ózekti máselelerdi, sonyń ishinde vedomstvoǵa qatysty taqyryptardy ashyq qarastyrady», - dedi Bolat Tilepov.
Onyń aitýynsha, sybailas jemqorlyqqa qarsy kúres tek qana memlekettik organdardyń kúshimen sheshilmeidi. Osy oraida qoǵamnyń belsendi músheleri retinde úkimettik emes uiymdardyń kómegi zor.
