Foto: Jambyl oblysynyń prokýratýrasy
Jambyl oblysy prokýratýrasynyń bastamasymen Bolat Nazarbaevpen úlestes Qordai aýdanyndaǵy bazardyń jerleri memleketke qaitaryldy, - dep habarlaidy "Ult aqparat" óńir prokýratýrasynyń baspasóz qyzmetine silteme jasap.
«2004 jyly Qordai aýdany ákimdiginiń jáne Qordai aýyldyq okrýgi ákiminiń aktilerimen B.N. Nazarbaevqa tiesili «Qarasai BN-Taraz» JShS-ǵa «Barys-2» saýda keshenine qyzmet kórsetý úshin aýdany 34,3017 ga ýchaske berildi.
Ýchaskeni berý kezinde onyń tártibi buzylǵan, atap aitqanda aýyl sharýashylyǵy maqsatyndaǵy erekshe qorǵalýǵa jatatyn aýdany 22,25 ga sýarmaly egistik jerlerdiń bir bóligi bazarǵa qyzmet kórsetý úshin berilgen», - delingen habarlamada.
Osyǵan bailanysty aýdan prokýratýrasy sotqa aýdan jáne aýyldyq okrýg ákimdikteriniń aktilerin, satyp alý-satý sharttaryn jaramsyz dep taný jáne kúshin joiý týraly talap qoiǵan.
«Jambyl oblystyq sotynyń azamattyq ister jónindegi sot alqasynyń 2023 jylǵy 28 jeltoqsandaǵy qaýlysymen «Qarasai BN-Taraz» JShS-men Qordai aýdany ákimdiginiń Jer qatynastary bólimi arasyndaǵy 24.07.2007 jylǵy №81 jáne №82 jer ýchaskelerin satyp alý-satý, jer ýchaskelerin óteýsiz berý týraly «Qordai Invest» JShS-nyń barlyq sharttary jaramsyz dep tanylyp, kúshteri joiyldy.
Sot qaýlysy ótken jyldyń 28 jeltoqsanynda zańdy kúshine endi, jer ýchaskelerine memlekettik aktilerdiń kúshi joiyldy», - delingen vedomstvo habarlamasynda.
