Aýyr atletikadan álemdik arenada Qazaqstannyń namysyn qorǵaityn basty úmitkerler belgili boldy, dep habarlaidy QazAqparat.
«Tokio Olimpiadasynda oń nátije kórsetken barsha sportshylardy quttyqtaimyn. Bul - úlken jaýapkershilik. Qazaqstannyń sportynda aýyr atletikanyń orny erekshe, onyń dáleli - Aziia jáne álem chempionattaryndaǵy bizdiń atletterdiń jetistigi. Aitar bolsaq, 2018 jyly AQSh-ta ótken jasóspirimder arasyndaǵy álem chempionatynda 5 birdei sportshymyz baryp, barlyǵy da úzdik nátije kórsetip, chempion bolyp oralǵan edi. Sol sekildi mysaldar jetip jatyr», - dedi aýyr atletikadan QR Memlekettik jattyqtyrýshysy Meńdihan Tápsiruly OKQ-de onlain ótken baspasóz máslihatynda.
Onyń aitýynsha, endigi ýaqytta erekshe kózge túsip, 2024 jylǵy Parij Olimpiadasyna barady dep úmit kúttirip otyrǵan aýyr atletter barshylyq.
«Erler arasynda Bekbolat Rahat, Abylai Áýelhanuly, Sapi Esengeldi, Nurǵiza Ádiletuly, Aqmolda Sairamkez, Anatolii Savelev, Artem Antonov syndy sportshylarymyz el namysyn qorǵaidy dep úmittenemiz. Al qyzdar arasynda Aizada Úmitdildá, Gúlnur Aiorai, Aisamal Sansyzbaeva, Aisha Omarova, Rýfina Shalqarova, Olga Postýpova, Nadejda Li, Raýshan Meshithanova sekildi álemdik jarysta des bermeitin aýyr atletterimiz bar», - deidi Meńdihan Tápsiruly.
