Prezidenttiń aitýynsha, bul rette jumys eki baǵyt boiynsha júrgiziledi: kapitaldy elge qaitarý nemese kapitaldy elge qaitarýdy yntalandyrý, sondai-aq offshorǵa qarjy ketýine tosqaýyl qoiý.
"Mundai mehanizmder álemniń kóptegen elinde qoldanylady, biz de osy baǵytta júrýimiz kerek. Bul jerde bankterdi osy jumysqa qalai tartý kerek ekenin túsiný qajet. Qarajat naryqtaǵy alypsatarlyqqa emes, naqty ekonomika ainalymyna túsýi kerek.
Kásipkerlerimiz ózderiniń tikelei jáne basty qyzmeti retinde naqty biznes-jobalarǵa nesie bere bastaýy úshin neni túzetý kerek? Árine, suraq qiyn, ony túsinemin, biraq ony sheshý kerek. Qazir bul - ekonomikalyq ózgeristerdiń negizgi tejegishi", - dedi Toqaev.
Memleket basshysy tabiǵi bailyǵymyzdy barynsha tiimdi paidalaný qajet ekenin aitty.
Úkimetke barlyq ken ornyna tekserý júrgizý, sheteldik jáne jergilikti investorlardy tarta otyryp, olardy odan ári igerý úshin paidalanylmaityn ken oryndaryn anyqtaý tapsyryldy.
"Eger ken orny bolashaqta paidalanylsa, ony alý kerek jáne aqsha salýǵa daiyn adamǵa berý kerek. Jumys istemeitin aktivter týraly olardy ekonomikalyq ainalymǵa tartý týraly aitsaq, onda bul máselege baiyppen qaraý kerek. Men bankter tarapynan osyndai muzdatylǵan aktivterdi satyp alýǵa zańdy túrde ýákilettik berilgen sýbektiler sheńberin keńeitýge bolady dep sanaimyn", - dedi Toqaev.
Qarjylyq retteý agenttigine Úkimetpen birlese otyryp, tsifrlyq platforma men infraqurylymdy qurý, daǵdarysqa ushyraǵan aktivterdi satyp alý-satý boiynsha naryq qalyptastyrý, olardy satyp alý úshin jeńildikter, onyń ishinde salyqtyq jeńildikter jasaý tapsyryldy.
"Elge investitsiia tartýdyń taǵy bir baǵyty memlekettik jeke seriktestikti qaita jańǵyrtý bolýy tiis. Búginde bul tetik memlekettik satyp alý rásimderin ainalyp ótý quralyna ainaldy. Shamadan tys artyqshylyqtar negizsiz beriledi. Mindetter, kepildikter, táýekelder men kirister bastamashylar men memleket arasynda tepe-teń bólinýi tiis", - dedi Prezident.
Úkimet memlekettik jeke seriktestikke qatysty jańa zamanaýi tásilderdi ázirleýi kerek ekeni aityldy.
