Búgin Iordaniianyń Amman qalasynda ótip jatqan bokstan Olimpialyq irikteý týrnirinde erler arasynda úsh qazaqstandyq synǵa túsedi, dep habarlaidy "Ult aqparat".
Atap aitar bolsaq, kúndizgi sessiiada 63 keli salmaqta el namysyn qorǵaityn Zákir Safiýllin jáne 81 keli salmaqta synǵa túsetin Bekzad Nurdáýletov sharshy alańǵa shyǵady. Al keshki sessiiada 75 keli salmaqta Ábilhan Amanqul Olimpiada joldamasyna talasty bastaidy.
Kúndizgi sessiia Nur-Sultan ýaqytymen saǵat 15:00-de, keshki sessiia 21:00-de bastalady.
Zákir Safiýllin qytailyq Jang Shanmen kezdesse, 81 kelidegi Bekzad Nurdáýletov Jańa Zelandiia ókili Jerom Pompellonege qarsy shyǵady. Al Ábilhan Amanqul Ońtústik Koreia ókili Kim Jinjiiamen kezdesedi.
Esterińizge sala keteiik, keshe áielder boksynan sharshy alańǵa shyqqan qazaqstandyq eki sportshy qarsylastaryna jol berip, joldamadan tys qaldy.
Týrnirde Olimpiada oiyndaryna barlyǵy 63 litsenziia úlestiriledi.
Qazaqstan quramasy sapynan Aziia-Tynyq muhity aimaǵy elderiniń irikteý týrnirine erlerden 8 salmaq, áielderden 5 salmaq sanatynda jalpy 13 boksshy synǵa túsedi. Atap aitqanda, erlerden 52 keli salmaqta Sáken Bibosynov, 57 kelide Serik Temirjanov, 63 keli salmaqta Zákir Safiýllin synǵa tússe, qazaqtyń «salmaǵy» atanyp ketken 69 kelide Abylaihan Júsipov el namysyn qorǵaidy. Al 75 keli salmaq sanatynda Ábilhan Amanqul, 81 kelide Bekzad Nurdáýletov, 91 keli salmaqta Vasilii Levit Olimpiada joldamasyna talasady.
Áielder boksynan 51 kelide Angelina Lýkas, 57 kelide Dámetken Kelimbet sharshy alańǵa shyǵady. 60 keli salmaqta Rimma Volosenko, 69 kelide Valentina Halzova synǵa tússe, 75 keli salmaqta Nadejda Riabets judyryqtasady.
