Búgin Almaty qalasyndaǵy «Balýan Sholaq» sport kesheninde bokstan konfederatsiia kýbogynyń jartylai finaldary ótip jatyr, dep habarlaidy "Ult aqparat".
Búgin jartylai finalda Túrkistan jáne Qaraǵandy oblystary ózara kúsh synasty. Boksshylar segiz salmaqta ózara sheberlik baiqasty. Alǵashqy jekpe-jekte 52 kelide Túrkistan oblysynan Sáken Bibosynov qaraǵandylyq Talǵat Syrymbetovti aiqyn basymdyqpen jeńip ketti. Kelemi 57 keli salmaqta qaraǵandylyq Rústem Shaýmenov túrkistandyq Qairat Erálievti, 63 kelide qaraǵandylyq Vasilii Samchýk tóreshilerdiń biraýyzdan qabyldaǵan sheshimimen túrkistandyq Shynybek Nazarbekovti tize búktirdi.
Al 69 kelide túrkistandyq Bekdáýlet Ibragimov qaraǵandylyq Baýyrjan Asylbekovti jeńse, 75 kelide tóreshiler qaraǵandylyq Ersultan Sovetov túrkistandyq Beken Pernehandy jeńgenin málim etti. Túrkistandyq Bek Nurmaǵambet 81 kelide qaraǵandylyq Erdos Nurqalyny aiqyn basymdyqpen utsa, 91 kelide túrkistandyq Abzal Quttybekov qaraǵandylyq qarsylasy Azamat Jumabekovten ailasyn asyrdy. Al 91 keliden joǵary salmaqta túrkistandyq Nurlan Saparbai qaraǵandylyq Dmitrii Ziskony jeńip ketti. Osylaisha Túrkistan oblysynyń quramasy qarsylasynan 5:3 esebimen basym túsip, jartylai finalǵa joldama aldy.
Al jartylai finalda taǵy bir jupty Nur-Sultan qalasy men Mańǵystaý oblysynyń komandalary qurady. Qazir eki komanda boksshylary arasyndaǵy alǵashqy jekpe-jek aiaqtaldy. Nur-Sultan qalasynyń boksshysy Azat Mahmetov mańǵystaýlyq Qýanysh Dúisenbaidan basym tústi.
Finalǵa joldama alǵan eki komanda erteń, 8 jeltoqsanda ózara sheberlik baiqasady.
Bokstan Konfederatsiia kýbogy 2010 jyldan beri turaqty túrde ótkizilip keledi. Budan buryn Mańǵystaý oblysy úsh márte jeńimpaz (2012, 2016, 2018) atansa, Nur-Sultan qalasy eki (2010, 2013), Túrkistan oblysy eki (2015, 2017), Qaraǵandy oblysy bir (2011) márte biik tuǵyrdan kórindi.
Bokstan Konfederatsiia kýbogynyń toptyq kezeńiniń jerebesi biylǵy jyldyń qyrkúiek aiynda tartylǵan bolatyn.
