Bokstan Qazaqstan Ulttyq quramasy Almatydaǵy Búkilálemdik AIVA boks akademiiasynyń bazasynda álem birinshiligine daiyndalyp jatyr. Bul týraly quramanyń bas bapkeri Ǵalymbek Kenjebaev málim etti, dep habarlaidy QazAqparat.
«Qazirgi tańda ulttyq quramanyń barlyq múshelerimen Almatyda Búkilálemdik AIVA boks akademiiasynyń bazasynda oqý-jattyǵý jiynyn ótkizip jatyrmyz. Bul - aldaǵy kele jatqan Álem chempionatyna daiyndyq. Alataý bókterinde boksshylar taýǵa shyǵý, tas laqtyrý, júgirý siiaqty fizikalyq daiyndyqtaryn jetildirýde. Endi sanaýly kúnderden keiin sońǵy daiyndyǵymyzdy elordada pysyqtap, ary qarai Ekaterinbýrgte ótetin Álem chempionatyna attanamyz», - dep atap ótti bas bapker.
Álem birinshiliginde el namysyn kimder qorǵaityny týraly saýalǵa Ǵ.Kenjebaev qysqa ǵana jaýap qaiyrdy.
«Álem birinshiliginde el namysyn kimderdiń qorǵaitynyn osy Almatydaǵy oqý-jattyǵý jiyny aiaqtalǵannan keiin aitamyz. Eń mańyzdysy, biylǵy jyldyń basty dodasyna boksshylar tolyq quramda baryp baq synaidy», - dedi Ǵalymbek Kenjebaev.
Aita keteiik, bokstan erler arasyndaǵy Álem chempionaty qyrkúiek aiynda Ekaterinbýrgte (Resei) ótedi dep josparlanǵan.
