Qazaqstandyq boksshy Vasilii Levit Sheshenstan Respýblikasynyń astanasy Groznyida ótken halyqaralyq týrnirde chempion atandy, dep habarlaidy QazAqparat tilshisi.
Qostanailyq boksshy 91 keli salmaqta kúsh synasty. Birinshi jekpe-jeginde reseilik Nazarbek Shamilovty utty. Munan soń ol ring iesi Saihan Bakaevtan basym túsip, finalǵa shyqty.
«Altyn» úshin talasta Levitke reseilik Shamil Mansýrov qarsy turdy. Alaida, tájiribeli qazaqstandyq qarsylasyn nebári ekinshi raýndta nokdýanǵa jiberdi. Kezdesý Vasilii Levittiń paidasyna sheshildi.
«Groznyida Ahmat-Hadji Kadyrovtyń qurmetine arnalǵan halyqaralyq boks týrniri aiaqtaldy. Men úsh kezdesý ótkizip, qýanyshyma orai, barlyǵynda jeńiske jettim. Quttyqtaýlaryńyz ben qoldaýlaryńyz úshin rahmet», - dep jazdy boksshy Instagram-daǵy paraqshasynda.
