Boksshy Angelina Lýkastyń 8 qyrkúiektegi úndeýinde aitylǵan áielder arasyndaǵy ulttyq quramanyń jaǵdaiyna qyzmettik tekseris júrgizý úshin arnaiy komissiia quryldy, dep habarlaidy QazAqparat.
Bul týraly Sport jáne dene shynyqtyrý isteri komitetiniń baspasóz qyzmeti málim etti. Komissiiaǵa taraptardyń ýáji men istiń matarialdaryn qarap, mynadai sharalar qabyldaý mindeti qoiylyp otyr:
- Qazaqstan boks federatsiiasy Ulttyq Olimpiada komitetimen birlesip, sport etikasyn buzǵany úshin eki boksshy – Nazym Qyzaibai men Angelina Lýkasty ýaqytsha shettetý máselesin qarastyrý;
- Sporttyq tártipti buzý faktileri boiynsha obektivti tergeý júrgizip, 20 qyrkúiekke deiin Sport jáne dene shynyqtyrý isteri komitetine ulttyq komandanyń básekege qabiletti quramyn jasaqtaý;
- Áielder quramasy bas bapkeriniń raporty boiynsha, dopingke qarsy ulttyq ortalyqtyń mamandaryn tarta otyryp, qurama komanda músheleriniń doping (tyiym salynǵan preparattar) qoldaný múmkindigine tekserý júrgizý;
- Komandadaǵy psihologiialyq ahýaldy jaqsartý, janjalǵa jol bermeý úshin psihologtardy, mediatorlardy tarta otyryp jumys júrgizýdi usyný.
«Ulttyq Olimpiada komitetine biyl 2 aqpanda qabyldanǵan №524/21-NSK eńbek shartynyń 5.3.18, 5.3.19 jáne 5.3.28-tarmaqtaryn buzǵany úshin Angelina Lýkasty tártiptik jaýapkershilikke tartý týraly máseleni qarastyrý jóninde sheshim qabyldaý úshin usynys jasaldy. Mádeniet jáne sport ministrligi aldaǵy ýaqytta osyndai keleńsiz jaǵdaiǵa jol bermeý úshin federatsiialardyń bárine komandadaǵy tárbielik jumysty kúsheitý qajettigi týraly hat joldady. Sondai-aq, bas bapker Erik Alǵabektiń ulttyq quramadaǵy baqylaýdy álsiretkenin atap ótý kerek. Bul komandadaǵy sporttyq tártipti júieli túrde buzýǵa alyp keldi», - dep jazylǵan komitettiń baspasóz qyzmeti taratqan aqparatta.
